காவலர் குடியிருப்பில் வசிக்கும் சிறப்பு எஸ்ஐ வீட்டுக்குள் இன்று காலை புகுந்த ஆயுதம் தாங்கிய கும்பல் அங்கு தஞ்சமடைந்திருந்த இளைஞரை சரமாரியாக வெட்டிக் கொலை செய்துவிட்டு தப்பிச் சென்றுவிட்டது.
திருச்சி மாநகரில் தமிழக முதல்வர் மு.க.ஸ்டாலின் தங்கியுள்ள இடத்திலிருந்து சுமார் ஒன்னரை கி.மீ தொலைவில், அதுவும் காவல்துறை சிறப்பு எஸ்ஐ வீட்டில் நடைபெற்றுள்ள இச் சம்பவம் திருச்சி மாநகர போலீஸார் மற்றும் பொதுமக்கள் மத்தியில் பெரும் அதிர்வலைகளை ஏற்படுத்தியுள்ளது.
திருச்சி பீம நகர் கீழத் தெருவைச் சேர்ந்தவர் தாமரைச் செல்வம். வயது 26. டூ வீலர் மெக்கானிக்கான தாமரைச் செல்வன் இன்று காலை வழக்கம்போல் வேலைக்கு புறப்பட்டுச் சென்றபோது, அவரை 5 பேர் மோட்டார் சைக்கிள்களில் பின்தொடர்ந்து வந்துள்ளனர். பீம நகர் போலீஸ் குடியிருப்பு அருகே வந்தபோது அவர்கள் தாமரைச் செல்வனின் மோட்டார் சைக்கிளை வழிமறித்துள்னர். இதனால் அங்கிருந்து போலீஸ் குடியிருப்புக்குள் நுழைந்த தாமரைச் செல்வன், சிறப்பு எஸ்ஐ செல்வராஜன் என்பவரது வீட்டிற்குள் தஞ்சமடைந்துள்ளார்.
அவரை விடாமல் துரத்திவந்த 5 பேரும், சிறப்பு எஸ்ஐ செல்வராஜின் வீட்டிற்குள் புகுந்து தாமரைச் செல்வனை சரமாரியாக வெட்டிக் கொன்றனர். இதைக் கண்டு, அதிர்ச்சியடைந்த எஸ்எஸ்ஐ செல்வராஜ் மற்றும் அவரது குடும்பத்தினர் கூச்சலிடவே, கொலையாளிகள் அங்கிருந்து தப்பியோடினர்.
அக் குடியிருப்பில் இருந்த மற்ற போலீஸ்காரர்கள் மற்றும் அவர்களது குடும்பத்தினர் சேர்ந்து கொலையாளிகளில் ஒருவரை மட்டும் மடக்கிப் பிடித்தனர். ஏனைய நால்வரும் தப்பியோடி விட்டனர்.
Comments are closed.