நடுவானில் உடைந்த விமானத்தின் கண்ணாடி!

மதுரையில் இருந்து இன்று (அக்.11) காலை சென்னை வந்த இண்டிகோ விமானத்தின் கண்ணாடி நடுவானில் உடைந்ததால் பரபரப்பு ஏற்பட்டது. நல்வாய்ப்பாக, விமானத்தில் பயணித்த 76 பயணிகளும் பத்திரமாக தரையிறக்கப்பட்டனர்.

மதுரையில் இருந்து இன்று காலை சென்னை புறப்பட்ட அவ்விமானத்தின் கண்ணாடியில் தரையிறங்குவதற்கு முன் விரிசல் ஏற்பட்டது. அதைக் கவனித்த விமானி, விமான நிலையத்தில் உள்ள விமானப் போக்குவரத்துக் கட்டுப்பாட்டாளருக்கத் தெரிவித்தார். இதையடுத்து, விமான நிலையத்தில் அனைத்து ஏற்பாடுகளும் செய்யப்பட்டன.

பின்னர், விமானம் பத்திரமாக தரையிறக்கப்பட்டது. பயணிகள் அனைவரும் விமானத்தில் இருந்து பத்திரமாக வெளியேற்றப்பட்டனர்.

நடுவானில் பறந்து கொண்டிருந்தபோது விமானத்தின் கண்ணாடி உடைந்ததற்கான காரணம் இன்னும் தெரியவில்லை. இதுகுறித்து விசாரணை நடைபெற்று வருகிறது.

மதுரைக்கு விமானம் திரும்பும் பயணம் ரத்து செய்யப்பட்டது. இதனால் பயணிகள் கடும் அவதிக்குள்ளாயினர். எனினும், அவர்களுக்கு மாற்று ஏற்பாடு செய்து கொடுக்கப்பட்டது என விமான நிறுவனம் தெரிவித்துள்ளது.

Comments are closed.