ஊருக்காக உழைத்தவருக்கு ஊர் மக்கள் இறுதி மரியாதை!

சேலம் மாவட்டம் வாழப்பாடியில் செவ்வாய்க்கிழமையன்று இறந்த பாண்டியன் என்ற 60 வயது நபருக்கு இறுதி மரியாதை செலுத்தும் வகையில் கிராம மக்கள் ஒன்றிணைந்து அவரது இறுதி ஊர்வல செலவுகளை ஏற்று நெகிழ்ச்சியை ஏற்படுத்தினர்.

வாழப்பாடி பேரூராட்சி அக்ரஹாரம் கிழக்குக்காடு பகுதியை சேர்ந்தவர் வி.சி.பாண்டியன் (60).
ஊர் கோயில் திருவிழாக்கள், பாரம்பரிய நிகழ்ச்சிகள் மற்றும் இறந்தவர்களின் இறுதிச் சடங்குகள் மற்றும் இறுதி ஊர்வலத்தை முன்னின்று நடத்தும் குடும்பத்தைச் சேர்ந்த பாண்டியன், கடந்த 15 ஆண்டுகளுக்கு மேலாக இக் கிராமத்தில் இறுதிச் சடங்குகள், இறுதி ஊர்வலம் மற்றும் நல்லடக்கம் செய்யும் பணிகளை முன் நின்று செய்து, துக்கத்திலுள்ள குடும்பத்தினருக்கு உதவியாக இருந்துள்ளார்.

குறிப்பாக, கரோனா பெருந்தொற்று பரவல் தருணத்தில் ஏராளமான உடல்களை அடக்கம் செய்து கிராம மக்களின் பாராட்டைப் பெற்றார்.

இந்நிலையில், செவ்வாய்க்கிழமை திடீர் மாரடைப்பால் பாண்டியன் உயிரிழந்தார்.

ஊர் மக்களுக்கு உழைத்த அவருக்கு மரியாதை செலுத்தும் வகையில் கிராம மக்கள் ஒன்றிணைந்து அவது இறுதி ஊர்வலம் மற்றும் நல்லடக்கம் செய்யும் செலவுகளை ஏற்றுக்கொண்டு நெகிழ்ச்சியை ஏற்படுத்தியுள்ளனர்.

சுமார் ரூ.75,000 நிதி திரட்டி கொடுத்து, ஊருக்கு உழைத்தவருக்கு இறுதி மரியாதை செலுத்தி, அவரது குடும்பத்தினரின் சுமையில் ஊர்மக்கள் பங்கெடுத்துக் கொண்டனர்.