5 நாள்களுக்குப் பிறகு மீண்டும் உதகை மலை ரயில் இயக்கம்!

மேட்டுப்பாளையம் – உதகை மலை ரயில் போக்குவரத்து, ஐந்து நாள்களுக்குப் பிறகு, மீண்டும் இன்று தொடங்கியது.

கோவை மாவட்டம் மேட்டுப்பாளையத்தில் இருந்து நீலகிரி மாவட்டம் உதகை மலைக்கு தினமும் இயக்கப்பட்டு வந்த ரயில் போக்குவரத்து, அடர்லி – ஹில்குரோவ் ரயில் நிலையங்களுக்கு இடையே பத்துக்கும் மேற்பட்ட இடங்களில் மண் சரிவு ஏற்பட்டதாலும், மலை ரயில் பாதையில் பெரும் பாறாங்கற்கள் உருண்டு விழுந்ததாலும், நவம்பர் 19ஆம் தேதியில் இருந்து மலை ரயில் சேவை நிறுத்தப்பட்டது.

இந்நிலையில், தண்டவாளத்தில் சரிந்து விழுந்த பாறாங்கற்கள் அகற்றப்பட்டு, தற்போது சீரமைப்பு பணிகள் முழுமையாக முடிவடைந்துள்ளன.

இதைத் தொடர்ந்து, ஐந்து நாள்களுக்குப் பிறகு மீண்டும் உதகை மலை ரயில் போக்குவரத்து இன்று தொடங்கியது. இதில் ஏராளமான சுற்றுலாப் பயணிகள் மகிழ்ச்சியுடன் பயணம் செய்தனர்.