எந்தக் கொம்பனாலும் திமுகவை தொட்டுக்கூட பார்க்க முடியாது: ஸ்டாலின்

பழைய எதிரிகள், புதிய எதிரிகள் என எந்தக் கொம்பனாலும் திமுவைத் தொட்டுக்கூட பார்க்க முடியாது என தமிழக முதல்வர் மு.க.ஸ்டாலின் தெரிவித்துள்ளார்.

கரூர் மாநகரின் புறவழிச்சாலையில் கோடாங்கிபட்டியில் செப்டம்பர் 17ஆம் தேதி திமுக சார்பில் முப்பெரும் விழா நடைபெறுகிறது.

அதை முன்னிட்டு, திமுக தொண்டர்களுக்கு திமுக தலைவரும் தமிழக முதல்வருமான ஸ்டாலின் கடிதம் எழுதியுள்ளார்.

அதில் அவர் கூறியிருப்பதாவது:

“முப்பெரும் விழா என்பது நம்மை நாமே ஊக்கப்படுத்திக் கொள்ளும் திருவிழா. அரிமா நோக்கு போல 75 ஆண்டுகால கழகத்தின் வரலாற்றுத் தடத்தைப் பெருமிதத்துடன் திரும்பிப் பார்த்து, உன்னத இலட்சியப் பயணத்தைத் தொய்வின்றித் தொடர்வதற்கான பாசறை. பழைய எதிரிகள்-புதிய எதிரிகள் என எந்தக் கொம்பனாலும் திராவிட முன்னேற்றக் கழகம் எனும் கொள்கை உறுதிமிக்க எஃகு கோட்டையைத் தொட்டுக்கூட பார்க்க முடியாது என்று உங்களில் ஒருவனான நானும், என்னுள் கலந்திருக்கும் உடன்பிறப்புகளான நீங்களும் சூளுரைக்கும் திருநாள்.

ஓரணியில் தமிழ்நாடு இயக்கத்தில் இணைந்துள்ள 1 கோடிக் குடும்பத்தினரும் சேர்ந்து, “தமிழ்நாட்டைத் தலைகுனிய விடமாட்டோம்” என உறுதி ஏற்கிறோம்” என அக்கடிதத்தில் ஸ்டாலின் தெரிவித்துள்ளார்.