பெற்றோரை இழந்த குழந்தைகளுக்கு மாதம் ரூ.2,000 வழங்கும் ‘அன்புக்கரங்கள்’ திட்டம்: ஸ்டாலின் இன்று தொடங்கி வைக்கிறார்!

பெற்றோரை இழந்த குழந்தைகள் தடையின்றி கல்வியைத் தொடர மாதந்தோறும் ரூ.2000 உதவித் தொகை வழங்கும் ‘அன்புக்கரங்கள்’ திட்டத்தை முதல்வர் ஸ்டாலின் இன்று (செப்.15) தொடங்கி வைக்கிறார்.

தமிழக அரசின் ‘தாயுமானவர்’ திட்டத்தின் ஒரு பகுதியாக, பெற்றோர் இருவரையும் இழந்த மற்றும் பெற்றோரில் ஒருவரை இழந்து மற்றொரு பெற்றோரால் பராமரிக்க இயலாத குழந்தைகளை அரவணைத்து தொடர்ந்து பாதுகாக்கும் வகையில் ‘அன்புக்கரங்கள்’ திட்டத்தை தமிழக அரசு அறிவித்துள்ளது.

இத் திட்டத்தின்கீழ் அக்குழந்தைகளின் 18வயது வரையிலான பள்ளிப் படிப்பு முடியும்வரை இடைநிற்றல் இன்றி கல்வியைத் தொடர, மாதம் ரூ.2,000 உதவித் தொகை வழங்கப்படும். மேலும், பள்ளிப் படிப்பு முடித்த பின்னர் கல்லூரிக் கல்வி மற்றும் உரிய திறன் மேம்பாட்டுப் பயிற்சிகளும் அவர்களுக்கு வழங்க வழிவகை செய்யும்.

இந்நிலையில், இத் திட்டத்தை முதல்வர் ஸ்டாலின் திங்கள்கிழமை (செப்.15) சென்னை கலைவாணர் அரங்த்தில் தொடங்கி வைத்து, குழந்தைகளுக்கு உதவித் தொகையை வழங்கவுள்ளார்.