காஞ்சிபுரம் டிஎஸ்பியை விடுதலை செய்ய உயர்நீதிமன்றம் உத்தரவு!

காஞ்சிபுரம் டிஎஸ்பி சங்கர் கணேஷ் கைது தொடர்பான மாவட்ட நீதிமன்ற உத்தரவை ரத்து செய்து சென்னை உயர்நீதமன்றம் உத்தரவிட்டுள்ளது.

டிஎஸ்பி சங்கர் கணேஷை உடனடியாக விடுதலை செய்ய உத்தரவிட்டதுடன் அவருக்கு எதிரான வழக்கு விசாரணைக்கும் உயர்நீதிமன்றம் தடை விதித்துள்ளது.

காஞ்சிபுரம் மாவட்டம் வாலாஜாபாத் வட்டம் பூசிவாக்கத்தில் பேக்கரி நடத்தி வருபவர் சிவா. இவரது கடைக்கு அதே பகுதியைச் சேர்ந்த முருகன் என்பவர் பொருள்கள் வாங்க வந்த நிலையில் இருவருக்கும தகராறு ஏற்பட்டது.

தகராறு முற்றிய நிலையில் சிவாவின் மருமகன் லோகேஷ் மற்றும் ஊழியர்களை முருகன் தாக்கியதாகத் தெரிகிறது.

இதுகுறித்து இரு தரப்பினரும் வாலாஜாபாத் காவல் நிலையத்தில் புகார் அளித்தனர்.

முருகனின் புகாரின்பேரில் போலீஸார் பேக்கரி உரிமையாளர் சிவா மற்றும் அவரது உறவினர்கள் உள்ளிட்ட 5 பேர் மீது வன்கொடுமை தடுப்புச் சட்டத்தில் வழக்கு பதிவு செய்தனர். பேக்கரி உரிமையாளர் சிவா அளித்த புகாரின்பேரில் முருகன் மீதும் வழக்கு பதிவு செய்தனர்.

வன்கொடுமைத் தடுப்புச் சட்டத்தின் கீழ் வழக்கு பதிவு செய்யப்பட்ட நிலையில், இவ் வழக்கின் மீது டிஎஸ்பி சங்கர் கணேஷ் ஒரு மாதமாக எந்த நடவடிக்கையும் எடுக்கவில்லை எனக் கூறி முருகன் தரப்பினர் காஞ்சிபுரம் மாவட்ட முதன்மை அமர்வு நீதிமன்றத்தில் வழக்கு தொடரப்பட்டது.

இவ்வழக்கை விசாரித்த, வன்கொடுமை தடுப்புச் சட்டத்தில் வழக்குப் பதிவு செய்தும் உரிய நடவடிக்கை மேற்கொள்ள தவறியதாக திங்கள்கிழமை நீதிமன்றத்தில் ஆஜரான காஞ்சிபுரம் டிஎஸ்பி சங்கர் கணேஷ{க்கு கண்டனம் தெரிவித்த நீதிபதி ப.உ.செம்மல், மாலை 5 மணிக்குள் எதிரிகளை கைது செய்து நீதிமன்றத்தில் ஆஜர்படுத்தவேண்டும் என்றும், இல்லையெனில், டிஎஸ்பியை சிறையில் அடைப்பேன் என்றும் எச்சரித்தார்.

இந்நிலையில், மாலை 5 மணி வரை போலீஸார் குற்றஞ்சாட்டப்பட்ட எதிரிகளை தேடி வந்த நிலையில், நீதிமன்றத்தில் காத்திருந்த டிஎஸ்பி சங்கர் கணேஷை காஞ்சிபுரம் கிளைச் சிறையில் அடைக்க நீதிபதி செம்மல் உத்தரவு பிறப்பித்தார்.

இதையடுத்து, வழக்கில் ஆஜராக வந்த டிஎஸ்பி சங்கர் கணேஷை சீருடையிலேயே காஞ்சிபுரம் கிளைச் சிறைக்கு நீதிபதியின் காரிலேயே அழைத்துச் சென்றனர் நீதிமன்ற ஊழியர்கள்.

காஞ்சிபுரம் மாவட்ட நீதிமன்றத்தின் கைது உத்தரவுக்கு எதிராக காவல்துறை சார்பில் சென்னை உயர்நீதிமன்றத்தில் மேல்முறையீடு செய்யப்பட்டது.

இவ்வழக்கு இன்று விசாரணைக்கு வந்த நிலையில் காஞ்சிபுரம் மாவட்ட நீதிமன்ற உத்தரவை ரத்து செய்துள்ளது சென்னை உயர்நீதிமன்றம்.