ஆதவ் அர்ஜுனா மீதான வழக்கு ரத்து!

எக்ஸ் தளத்தில் சர்ச்சைக்குரிய வகையில் பதிவிட்டதாக தவெக தேர்தல் பிரிவு பொதுச் செயலாளர் ஆதவ் அர்ஜுனாவுக்கு எதிராக தொடரப்பட்ட வழக்கை சென்னை உயர் நீதிமன்றம் ரத்து செய்துள்ளது.

கரூரில் விஜய் பிரசாரத்தின்போது ஏற்பட்ட கூட்ட நெரிசலில் சிக்கி 41 பேர் உயிரிழந்த சம்பவம் தொடர்பாக வழக்குப் பதிவு செய்த போலீஸார், தவெக நிர்வாகிகளைக் கைது செய்தனர்.

இதனிடையே, தவெக தேர்தல் பிரிவு பொதுச் செயலாளர் ஆதவ் அர்ஜுனா, தனது எக்ஸ் தள பக்கத்தில், அரசின் அடக்குமுறைக்கு எதிராக இலங்கை, நேபாளத்தில் நடந்ததுபோல தமிழகத்திலும் புரட்சி வெடிக்கும் எனப் பதிவிட்டிருந்தார். பின்னர் அதை அவரே நீக்கிவிட்டார்.

இந்நிலையில், அவர் மீது போலீஸார் பல்வேறு பிரிவுகளில் வழக்குப் பதிவு செய்தனர்.  இவ்வழக்கை ரத்துச் செய்யக்கோரி ஆதவ் அர்ஜுனா, சென்னை உயர்நீதிமன்றத்தில் மனு தாக்கல் செய்தார். இவ்வழக்கு நீதிபதி ஏ.டி.ஜெகதீஷ் சந்திரா முன்பு விசாரணைக்கு வந்தது.

அப்போது மனுதாரர் தரப்பில் ஆஜரான மூத்த வழக்கறிஞர் அபிஷேக் மனு சிங்வி, மனுதாரர் கடந்த செப்.29ஆம் தேதி இரவு 11.28 மணிக்கு இட்ட பதிவை நள்ளிரவு 12.02 மணிக்கு நீக்கிவிட்டார். சுமார் 34 நிமிஷங்கள் இருந்த இப்பதிவை பொதுமக்கள் பலர் பார்த்திருக்க வாய்ப்பில்லை. அப் பதிவில் எந்த உள்நோக்கமும் இல்லை. குற்றச்சாட்டுக்கு முகாந்திரம் உள்ளதா என ஆரம்பக்கட்ட விசாரணை கூட நடத்தாமல் வழக்குப் பதிவு செய்துள்ளனர் என வாதிட்டார்.

அப்போது குறுக்கிட்ட நீதிபதி, சமூக வலைதளத்தில் முதலில் பதிவு செய்துவிட்டு பின்னர் மனுதாரர் அப் பதிவை நீக்கியதை ஒப்புக்கொள்கிறீர்களா எனக் கேள்வி எழுப்பினார்.

அதற்கு ஆம் என பதிலளித்த வழக்கறிஞர் அபிஷேக் மனு சிங்வி, ஒருவேளை அப்பதிவை நீக்கவில்லை என்றாலும், வழக்குப்பதிவு செய்ய முகாந்திரம் இல்லை. ஆதவ் அர்ஜுனா குற்றப் பின்னணி கொண்டவர் அல்ல. எதிர்க்கட்சி என்ற அடிப்படையில் சில கருத்துகளை அவர் பதிவிட்டுள்ளார் என விளக்கம் அளித்தார்.
மேலும், உள்நோக்கத்துடன் கருத்து பதிவிடவில்லை என்றும், உடனடியாக அப்பதிவு நீக்கப்பட்டுவிட்டது என்றும் ஆதவ் அர்ஜுனா தரப்பில் நீதிமன்றத்தில் தெரிவிக்கப்பட்டது.

காவல்துறை தரப்பில் ஆஜரான மூத்த வழக்கறிஞர் என்.ஆர்.இளங்கோ, இதுகுறித்து வழக்குப்பதிந்து விசாரிக்க போலீஸாருக்கு அதிகாரம் உள்ளது. மனுதாரரின் பதிவை ஒரு லட்சம் பேர் பார்த்துள்ளனர். இது தொடர்பான வழக்கு விசாரணைக்கு ஆஜராக போலீஸார் சம்மன் அனுப்பியும் மனுதாரர் விசாரணைக்கு ஆஜராகவில்லை என வாதிட்டார்.

இருதரப்பு வாதங்களையும் கேட்ட நீதிபதி, தவெக தேர்தல் பிரிவு பொதுச் செயலாளர் ஆதவ் அர்ஜுனாவுக்கு எதிராக தொடரப்பட்ட வழக்கை ரத்து செய்து தீர்ப்பளித்தார்.