தமிழக வெற்றிக் கழகம் பதிவுபெற்ற கட்சியா அல்லது தேர்தல் ஆணையத்தால் அங்கீகரிக்கப்பட்ட கட்சியா என்ற அடிப்படை விஷயம் கூட தெரியாமல், தவெகவின் அங்கீகாரத்தை ரத்துச் செய்ய வேண்டும் எனக்கோரி சென்னை உயர்நீதிமன்றத்தில் மனு தாக்கல் செய்து அனைவரின் நகைப்புக்கும் உள்ளாகியுள்ளார் மதுரையைச் சேர்ந்த செல்வகுமார் என்ற வழக்கறிஞர்.
தவெக அங்கீகரிக்கப்படாத கட்சி என்பதால், அக்கட்சியின் அங்கீகாரத்தை ரத்து செய்ய முடியாது என இந்திய தேர்தல் ஆணையம் தெரிவித்துள்ளது.
கரூரில் தவெக தலைவர் விஜய் தலைமையில் செப்.27ம் தேதி இரவு நடைபெற்ற பிரசார கூட்டத்தில் ஏற்பட்ட நெரிசலில் சிக்கி 41 பேர் உயிரிழந்ததுடன், நூற்றுக்கு மேற்பட்டோர் காயமடைந்தனர்.
இச்சம்பவம் தொடர்பாக, தவெகவின் அங்கீகாரத்தை ரத்து செய்யுமாறு கோரி மதுரையைச் சேர்ந்த செல்வக்குமார் என்ற வழக்கறிஞர் சென்னை உயர்நீதிமன்றத்தில் மனு தாக்கல் செய்தார்.
இம்மனு தலைமை நீதிபதி எம்.எம்.ஸ்ரீவஸ்தவா மற்றும் ஜி.அருள்முருகன் அமர்வில் விசாரணைக்கு வந்தது. அப்போது, ‘தமிழக வெற்றிக் கழகம் அங்கீகரிக்கப்பட்ட கட்சி என்பதால் அதன் அங்கீகாரத்தை ரத்து செய்ய கோரிக்கை எழுப்ப முடியாது’ என இந்திய தேர்தல் ஆணையம் தரப்பில் தெரிவிக்கப்பட்டது.
எவர் வேண்டுமானாலும் கட்சி தொடங்கி அதை முறையாகப் பதிவு செய்து கொள்ளலாம். அவை பதிவுபெற்ற கட்சிகள் ஆகும். ஆனால், தேர்தலில் போட்டியிட்டு ஒரு குறிப்பிட்ட சதவீத வாக்குகளைப் பெற்ற கட்சிகளுக்கு மட்டுமே இந்திய தேர்தல் ஆணையம் அங்கீகாரம் வழங்கும். அவை அங்கீகரிக்கப்பட்ட கட்சிகள் என்ற அடிப்படை விசயம் கூட தெரியாமல் வழக்கறிஞர் செல்வக்குமார் மனு தாக்கல் செய்துள்ளது பொதுமக்கள் மற்றும் சக வழக்கறிஞர்கள் மத்தியில் நகைப்புக்குள்ளாகி உள்ளது.
Comments are closed.