கடைகளை உடைத்து சேதப்படுத்திய காட்டு யானைகள்!

வால்பறை எஸ்டேட் பகுதிக்குள் நுழைந்த காட்டு யானைகள் மளிகை மற்றும் தேநீர்க் கடைகளை உடைத்து சேதப்படுத்தின.

கோவை மாவட்டம் வால்பாறை சுற்றுவட்டார எஸ்டேட் பகுதிகளில் காட்டு யானைகள் நடமாட்டம் அதிகரித்துள்ளது. வால்பாறையை அடுத்துள்ள கூழாங்கல் ஆற்றுப்பகுதியில் திங்கள்கிழமை நள்ளிரவு புகுந்த காட்டு யானைகள் ஐந்து கடைகளை சேதப்படுத்தின.

இதேபோல வால்பாறை அருகேயுள்ள வெள்ளமலை எஸ்டேட் பகுதிக்கு கூட்டமாக வந்த யானைகள், சிராஜ் என்பவர் நடத்திவரும் மளிகைக் கடையை முற்றிலுமாக உடைத்து சேதப்படுத்தின. கடையில் இருந்த அனைத்துப் பொருள்களையும் வெளியே இழுத்துப் போட்டு சேதப்படுத்தின.

தகவலறிந்து வந்த வால்பாறை சரக வனத்துறையினர் காட்டு யானைகளை வனப்பகுதிக்குள் விரட்டினர். மேலும் சோலையாறு அணை இடதுகரை பகுதியில் மணிவண்ணன் என்பவரது வீட்டின் கதவு, ஜன்னல் மற்றும் சுவரை இடித்து வீட்டில் இருந்த பொருள்களை வெளியே இழுத்துப் போட்டு சேதப்படுத்தின.

காட்டு யானைகளை குடியிருப்பு பகுதிக்கு வராமல் தடுக்கும் பணியில் வனத்துறையினர் ஈடுபட வேண்டும் என வால்பாறை பகுதி பொதுமக்கள் கோரிக்கை விடுத்துள்ளனர்.