தமிழகத்தில் நடப்பது மக்களாட்சி அல்ல, கொடுங்கோலாட்சி : விஜய் கடும் தாக்கு!

தங்களது உரிமைகளுக்காக அறவழியில் போராடி வந்த தூய்மைப் பணியாளர்களை அராஜகப் போக்குடன் மனிதாபிமானமற்ற முறையில் இரவோடு இரவாகக் கைது செய்த திமுக அரசுக்கு கண்டனம் தெரிவித்துள்ளார் நடிகரும், தமிழக வெற்றிக் கழக தலைவருமான விஜய்.

இதுகுறித்து இன்று வெளியிட்டுள்ள அறிக்கையில், நள்ளிரவில் நடைபெற்றுள்ள இக் கைது நடவடிக்கையைப் பார்க்கும்போது மனசாட்சியுள்ள எவராலும் தாங்கிக்கொள்ள முடியாத அளவிற்கு பெண்கள் மீது வன்முறை கட்டவிழ்த்து விடப்பட்டிருப்பது தெரிகிறது எனக் கூறியுள்ளார் விஜய்.

கைது செய்யப்பட்டுள்ள தூய்மைப் பணியாளர்கள் வெவ்வேறு இடங்களில் தங்களின் குடும்பத்தினரோடு கூடத் தொடர்புகொள்ள முடியாத வகையில், எவ்வித உதவிகளும் கிடைக்காத வகையில் அடைத்து வைக்கப்பட்டுள்ளதாகக் குறிப்பிட்டுள்ள விஜய், “குடும்பத்தினரோடு கூடத் தொடர்புகொள்ள முடியாத அளவிற்கு அடைத்து வைக்க, தூய்மைப் பணியாளர்கள் என்ன தேச விரோதிகளா?” எனக் கேள்வி எழுப்பியுள்ளார்.
ஆளும் அரசுக்கு மனசாட்சி சிறிதளவேனும் இருக்கிறதா? எனக் கேள்வி எழுப்பியுள்ளதுடன், தமிழகத்தில் நடப்பது மக்களாட்சி அல்ல, கொடுங்கோலாட்சிதான் என்பது தெளிவாகிறது எனக் கூறியுள்ளார் தவெக தலைவர் விஜய்.