பிகாரில் ‘இண்டி’ கூட்டணி ஆட்சிக்கு வந்தால், மத்திய அரசு கொண்டுவந்துள்ள வக்ஃப் திருத்தச் சட்டத்தை குப்பையில் வீசுவோம் என அக்கூட்டணியின் முதல்வர் வேட்பாளர் தேஜஸ்வி யாதவ் வாக்குறுதி அளித்துள்ளார்.
பிகாரில் முஸ்லிம்கள் அதிகம் வசிக்கும் கதிஹால், கிஷண்கஞ்ச் மாவட்டங்களில் ஞாயிற்றுக்கிழமை தேர்தல் பிரசாரம் மேற்கொண்ட ராஷ்ட்ரீய ஜனதா தளம் (ஆர்ஜெடி) தலைவர் தேஜஸ்வி யாதவ் பேசியதாவது:
எனது தந்தை லாலு பிரசாத் யாதவ் எந்த நேரத்திலும் மதவாத சக்திகளுடன் சமரசம் செய்து கொண்டது இல்லை. ஆனால் முதல்வர் நிதீஷ்குமார் மதவாத சக்திகளின் முழு ஆதரவாளராக உள்ளார். அவர் மூலம் ஆர்எஸ்எஸ் உள்ளிட்ட அமைப்புகள் மாநிலத்தில் மத வெறுப்புணர்வைப் பரப்புகின்றன. நாடு முழுவதுமே இதே பிரச்சினைதான் உள்ளது.
பிகாரில் எங்கள் கூட்டணி ஆட்சிக்கு வந்தால் மத்திய அரசு கொண்டுவந்துள்ள வக்ஃப் திருத்தச் சட்டத்தை குப்பையில் வீசி எறிவோம். முதல்வர் இப்போது சுய சிந்தனையில் செயல்படவில்லை. அனைத்து துறைகளிலும் ஊழல் மலிந்து விட்டது. சட்டம்-ஒழுங்கு முற்றிலும் சீர்குலைந்துவிட்டது.
நிதீஷ்குமார் 20 ஆண்டுகளாக முதல்வராக உள்ளார். நரேந்திர மோடி 11 ஆண்டுகளாக பிரதமராக உள்ளார். ஆனால், பிகார் தொடர்ந்து பின்தங்கிய மாநிலமாகவே உள்ளது என தேஜஸ்வி யாதவ் தெரிவித்தார்.
Comments are closed.