துபையில் நடைபெற்றுவரும் விமான கண்காட்சியில் சாகசத்தில் ஈடுபட்ட இந்திய விமானப்படையின் தேஜஸ் விமானம் இன்று (வெள்ளிக்கிழமை) எதிர்பாராவிதமாக விபத்துக்குள்ளானது. இச் சம்பவத்தில் அதன் விமானி பரிதாபமாக இறந்தார்.
விபத்துக்கான காரணத்தை அறிய விசாரணைக்குழு அமைக்கப்பட்டுள்ளது.
துபையில் பல்வேறு நாடுகளின் விமானங்கள் பங்கேற்ற கண்காட்சி நவ.17 ஆம் தேதி முதல் நடைபெற்று வந்தது. கண்காட்சியின் இறுதி நாளான இன்று சாகசத்தில் ஈடுபட்ட இந்தியாவின் பெருமைமிகு தேஜஸ் விமானம் கீழே விழுந்து நொறுங்கி, தீப்பிடித்து எரிந்தது. உள்ளுர் நேரப்படி இன்று பிற்பகல் 2.10 மணியளவில் இவ்விபத்து நடைபெற்றது.
இதுபற்றி இந்திய விமானப்படை தனது எக்ஸ் பக்கத்தில்,
“துபை விமான கண்காட்சியில் இந்திய விமானப்படையின் தேஜஸ் விமானம் விபத்துக்குள்ளானது. இவ்விபத்தில் விமானி உயிரிழந்தார்.
அவரது இழப்புக்கு இந்திய விமானப்படை ஆழ்ந்த வருத்தத்தை தெரிவித்துக் கொள்கிறது. இத் துயரமான நேரத்தில் அவரது குடும்பத்தினருடன் இந்திய விமானப்படை துணை நிற்கிறது.
விபத்துக்கான காரணத்தை அறிய விசாரணைக்குழு அமைக்கப்பட்டுள்ளது” எனக் கூறப்பட்டுள்ளது.
கடந்த 2 நாள்களாக துபை கண்காட்சியில் இந்திய விமானம் இடம்பெறவில்லை எனக் கூறப்படுகிறது. இன்றைய அட்டவணையில் தேஜஸ் விமானம் 3ஆவதாக இடம் பெற்றிருந்தது. தேஜஸ் விமானத்தைப் பார்க்க பார்வையாளர்கள் அதிகம் கூடியிருந்தனர்.
இந்நிலையில் விமானம் விபத்துக்குள்ளானது அங்கிருந்த பார்வையாளர்களை அதிர்ச்சிக்குள்ளாக்கியது. நல்வாய்ப்பாக, விமானம் விழுந்த இடத்தில் மக்கள் யாரும் இல்லை. அதனால் பெரும் அசம்பாவிதம் தவிர்க்கப்பட்டது எனத் தகவல்கள் தெரிவிக்கின்றன.
Comments are closed.