லஞ்ச ஒழிப்புத்துறை வளையத்தில் தஞ்சை வட்டாட்சியர்!

மனு வரப்பெற்ற மூன்றே நாளில் சுமார் 2.42 ஏக்கர் அரசு நீர்நிலை புறம்போக்கு நிலத்தை ‘தாரை வார்த்த’ தஞ்சாவூர் வட்டாட்சியரின் நடவடிக்கையின் பின்னணி குறித்து லஞ்ச ஒழிப்புத்துறை போலீஸார் விசாரணை மேற்கொண்டு வருகின்றனர்.

தஞ்சாவூர் வட்டம் பிள்ளையார்பட்டி கிராமம் கயிறு வாரியப் பகுதியில் கட்டப்பட்டு வரும் அருள்மிகு சக்தி விநாயகர் ஆலயத்தின் பாதுகாப்பு கருதி கோவிலைச் சுற்றி தடுப்பு வேலி அமைப்பதற்கும் அதே பகுதியில் சிறுவர் பூங்கா அமைப்பதற்கும் அனுமதி கோரி கோவில் நிர்வாகக் குழு சார்பில் அதன் தலைவர் வெங்கடேஸ் குமார் என்பவர் 07.07.2025 அன்று தஞ்சாவூர் வட்டாட்சியரிடம் மனு கொடுத்துள்ளார்.

அதனடிப்படையில், வல்லம் சரக வருவாய் ஆய்வாளர் அளித்த விசாரணை அறிக்கையின் அடிப்படையில், சக்தி விநாயகர் ஆலயம் மற்றும் அதனைச் சார்ந்த பகுதியில் சிறுவர் பூங்கா அமைத்து, அதனைச் சுற்றி தடுப்பு வேலி அமைப்பதற்காக தஞ்சாவூர் வட்டாட்சியர் சிவக்குமார், அரசு விதிகளை காற்றில் பறக்கவிட்டு, 0.94.00 எக்டேர்ஸ் (சுமார் 2.42 ஏக்கர்) அரசு வாரிப் புறம்போக்கு நிலத்தை ஒதுக்கீடு செய்து 10.07.2025 அன்று உத்தரவிட்டுள்ளார்.

அதாவது, கோரிக்கை மனு வரப்பெற்ற மூன்றே நாளில், வட்டாட்சியர் உள்ளிட்ட வருவாய்த்துறையினர் தங்களுக்கு அன்றாடம் இருந்துவரும் பணிச்சுமைக்கு இடையே மின்னல் வேகத்தில் செயல்பட்டு, அரசு விதிகளை காற்றில் பறக்கவிட்டு, சுமார் 2.42 ஏக்கர் நிலத்தை ஒதுக்கீடு செய்தது பெரும் சர்ச்சைக்குள்ளானது.

கோவில் நிர்வாகக் குழுவினர் ஊராட்சி மன்ற தண்ணீர் தொட்டியையும் உள்ளடக்கி வேலி போட்டனர்.

இதற்கு அதே பகுதியைச் சேர்ந்த மற்றொரு தரப்பினர் கடும் எதிர்ப்பு தெரிவித்தனர். இதையடுத்து, மாவட்ட ஆட்சியரின் உத்தரவின்பேரில், 29.07.2025 அன்று பிற்பகல் 4 மணியளவில் தஞ்சாவூர் வருவாய்க் கோட்டாட்சியர் அலுவலகத்தில் அப்போதைய வருவாய்க் கோட்டாட்சியர் இலக்கியா தலைமையில் அமைதிப் பேச்சுவார்த்தை நடைபெற்றது.

அக் கூட்டத்தில் எடுக்கப்பட்ட முடிவுகளின்படி, தஞ்சாவூர் வட்டாட்சியரால் ஒதுக்கீடு செய்யப்பட்ட உத்தரவு ரத்து செய்யப்பட்டு, வாரிப் புறம்போக்கு நிலத்தில் அமைக்கபட்டிருந்த வேலி காவல்துறை பாதுகாப்புடன் 13.08.2025 அன்று அகற்றப்பட்டது.

அப்போது, வாரி புறம்போக்கு நிலத்தில் பல தலைமுறைகளாக  குடியிருந்துவந்த நபர்களுக்கு உரிய முறையில் நோட்டீஸ் எதுவும் சார்வு செய்யாமல், அங்கிருந்த ஊராட்சி தூய்மைப் பணியாளின் குடியிருப்பு உள்பட 11 நபர்களின் வீடுகள் ஜேசிபி இயந்திரம் கொண்டு இடித்து அகற்றப்பட்டது.

 மனு வரப்பெற்ற மூன்றே நாளில் 2.42 ஏக்கர் நிலத்தை, அதுவும் நீர்நிலை புறம்போக்கு நிலத்தை, அரசு விதிமுறைகளை மீறி ஒதுக்கீடு செய்த தஞ்சாவூர் வட்டாட்சியர் சிவக்குமார், வருவாய் ஆய்வாளர் கோபாலகிருஷ்ணன், கிராம நிர்வாக அலுவலர் பிரபாகர் ஆகிய மூவரும் முறைப்படி பணி இடைநீக்கம் செய்யப்பட்டு, முழு விசாரணை நடத்தப்பட்டிருக்க வேண்டும். ஆனால், என்ன காரணத்தினாலோ அம் மூவர் மீதும் இதுவரை எந்தவொரு நடவடிக்கையும் எடுக்கப்படவில்லை. இது பொதுமக்கள் மத்தியில் சந்தேகத்தை கிளப்பியுள்ளது என்கின்றனர் அப்பகுதி மக்கள்.

இந்நிலையில், இம் முறைகேடு குறித்து வரப்பெற்ற புகாரின் அடிப்படையில், தஞ்சாவூர் வட்டாட்சியர் உள்ளிட்ட வருவாய்த்துறையினர் இவ்வளவு அவசரமாக செயல்பட்டதற்கான பின்னணி குறித்து ஊழல் தடுப்பு மற்றும் கண்காணிப்பு துறையினர் பூர்வாங்க விசாரணை மேற்கொண்டு வருகின்றனர். இம் முறைகேடு குறித்து மாவட்ட நிர்வாகத்தால் எடுக்கப்பட்ட நடவடிக்கை குறித்து அறிய, லஞ்ச ஒழிப்புத்துறையினர் தஞ்சை மாவட்ட ஆட்சியருக்கு கடிதம் அனுப்பியுள்ளனர்.