ராகுல் காந்திக்கு நான் மூத்த அண்ணன்: முதல்வர் ஸ்டாலின்

மக்களவை எதிர்க்கட்சித் தலைவர் ராகுல் காந்திக்கு தான் மூத்த அண்ணன் என தமிழக முதல்வர் மு.க.ஸ்டாலின் தெரிவித்துள்ளார்.

சென்னை தேனாம்பேட்டையில் இன்று காலை நடைபெற்ற காங்கிரஸ் கட்சியின் விருதுநகர் கிழக்கு மாவட்டத் தலைவர் ஸ்ரீராஜா சொக்கர் இல்லத் திருமணவிழாவில் முதல்வர் ஸ்டாலின் கலந்து கொண்டார்.

திருமணத்தை நடத்திவைத்த பிறகு மணமக்களை வாழ்த்திப் பேசிய முதல்வர் ஸ்டாலின், “திமுக ஆட்சியில்தான் சுயமரியாதை திருமணங்களுக்கு அங்கீகாரம் அளிக்கப்பட்டது. சட்டப்பேரவையில் எப்படி பேச வேண்டும் என எனக்கு பாடம் எடுத்தவர் சொக்கர்.

காங்கிரஸின் இளம் தலைவராக விளங்கிக் கொண்டிருக்கும் சகோதரர் ராகுல் காந்தி, தனிப்பட்ட முறையில் என்மேல் காட்டக்கூடிய அன்பை வார்த்தைகளால் சொல்ல முடியாது. ராகுல் காந்தியை சகோதரர் என்று அழைப்பதற்கு காரணம் அவர் என்னை அண்ணன் என்று அழைப்பதுதான். அவருக்கு நான் மூத்த அண்ணன்” எனத் தெரிவித்தார்.