சமூக வலைத்தளங்களில் செயல்படும் யூடியூப் சேனல்களில் நடிகர் சங்கம் மற்றும் நடிகர், நடிகைகள் குறித்து அவதூறான செய்திகள் பரப்புபவர்களுக்கு 3 மாத கடுங்காவல் சிறைத் தண்டனை வழங்க வேண்டும் என தென்னிந்திய நடிகர் சங்கம் வலியுறுத்தியுள்ளது.
இக் கோரிக்கையை வலியுறுத்தி சென்னை தேனாம்பேட்டையில் இன்று நடைபெற்ற தென்னிந்திய நடிகர் சங்கத்தின் 69-வது பொதுக்குழுக் கூட்டத்தில் தீர்மானம் நிறைவேற்றப்பட்டது.
இக் கூட்டத்திற்கு சங்கத் தலைவர் நாசர் தலைமை யில் நடைபெற்ற இப் பொதுக்குழு கூட்டத்தை நடிகைகள் லதா, லட்சுமி, கோவை சரளா உள்ளிட்ட பெண் நிர்வாகிகள் குத்துவிளக்கேற்றி தொடங்கி வைத்தனர். பொதுச் செயலாளர் விஷால் வரவேற்றார்.
டெல்லி கணேஷ், சரோஜா தேவி, ராஜேஷ், மனோஜ் கே.பாரதி, ரோபோ சங்கர் உள்ளிட்ட 70க்கு மேற்பட்ட மறைந்த கலைஞர்களுக்கு அஞ்சலி செலுத்தப்பட்டது.
மூத்த கலைஞர்களை கௌரவிக்கும் பொருட்டு 5 கலைஞர்களுக்கு சங்கரதாஸ் சுவாமிகள் விருது வழங்கி சிறப்பிக்கப்பட்டது.
பழம்பெரும் நடிகை எம்.என்.ராஜத்துக்கு ‘வாழ்நாள் சாதனையாளர் விருது’ வழங்கப்பட்டது.
பத்மபூஷன் விருது பெறும் நடிகர் அஜித்குமார், நடிகை ஷோபனா ஆகியோருக்கு பாராட்டு தெரிவிக்கப்பட்டது.
தேசிய விருதுபெற்ற எம்.எஸ்.பாஸ்கர், ஜி.வி.பிரகாஷ், ஊர்வசி ஆகியோர் கௌரவிக்கப்பட்டனர்.
சிம்பொனி இசை அமைத்த இசைஞானி இளையராஜாவுக்கு பாராட்டு விழா நடத்திய தமிழக அரசுக்கு நன்றி தெரிவிக்கப்பட்டது.
நடிகர் சங்க உறுப்பினர்களின் குழந்தைகளுக்கு கல்வி உதவி வழங்கிய ரஜினிகாந்துக்கு நன்றி தெரிவிக்கப்பட்டது.
இக் கூட்டத்தில் முன்னணி நடிகர், நடிகைகள் பலர் பங்கேற்காதது குறித்து வருத்தம் தெரிவிக்கப்பட்டது.
சமூக வலைத்தளங்களில் செயல்படும் யூடியூப் சேனல்களில் நடிகர் சங்கத்தையும், நடிகர்-நடிகைகள் குறித்தும் அவதூறான செய்திகள் பரப்புபவர்களுக்கு 2 மாத கடுங்காவல் சிறைத் தண்டணை வழங்க வேண்டும், மன உளைச்சலுக்கு உள்ளான நமது சங்க உறுப்பினருக்கு அந்த நபர் ரூ.3 லட்சம் நஷ்ட ஈட்டுத் தொகை வழங்க வேண்டும், அவதூறு செய்தியை பதிவேற்றம் செய்யும் சமூக வலைத்தள சேனல் நிறுவனம் நிரந்தரமாக முடக்கப்பட வேண்டும் என்பன உள்ளிட்ட தீர்மானங்கள் இக் கூட்டத்தில் நிறைவேற்றப்பட்டன.
Comments are closed.