கரூரில் தவெக பிரசார கூட்டத்தில் நெரிசல் ஏற்பட்டு 41 பேர் உயிரிழந்த சம்பவம் குறித்து மதுரை கிளையில் விசாரணை நடைபெற்ற நிலையில், சென்னை உயர்நீதிமன்ற அமர்வு விசாரித்தது ஏன் என உச்சநீதிமன்ற நீதிபதிகள் கேள்வி எழுப்பியுள்ளனர்.
கரூர் சம்பவம் தொடர்பாக சென்னை உயர்நீதிமன்றம் சிறப்பு விசாரணைக்குழு அமைத்து பிறப்பித்த உத்தரவை எதிர்த்தும், சிபிஐ விசாரணை கோரியும் தவெக தரப்பில் தாக்கல் செய்யப்பட்ட மனுக்கள் இன்று உச்சநீதிமன்றத்தில் விசாரணைக்கு வந்தது.
தமிழக அரசு சார்பில் மூத்த வழக்குரைஞர்கள், முன்னாள் அட்டர்னி ஜெனரல் முகுல் ரோஹ்தகி, திமுக எம்.பி. வில்சன் ஆஜராகி வாதங்களை முன் வைத்தனர்.
தமிழக அரசின் வாதங்களைக் கேட்ட உச்சநீதிமன்ற நீதிபதிகள், மதுரை அமர்வில் வழக்கு தொடரப்பட்டு விசாரணை நடைபெற்று வரும் நிலையில், சென்னையில் உயர்நீதிமன்றத்தில் விசாரணை நடத்த என்ன அவசியம் ஏற்பட்டது எனக் கேள்வி எழுப்பினர்.
மேலும், சென்னை, மதுரை நீதிமன்றங்கள் ஒரே நாளில் எப்படி வெவ்வேறு உத்தரவுகளை பிறப்பித்தன என்றும் உச்சநீதிமன்ற நீதிபதிகள் கேள்வி எழுப்பினர்.
இது கொடூரமான மரணம் என்பதால்தான் உயர்நீதிமன்றம் இதில் உத்தரவுகளை பிறப்பித்துள்ளது என வழக்கறிஞர் வில்சன் கூறினார்.
அதைக் கேட்ட உச்சநீதிமன்ற நீதிபதிகள், வழிகாட்டு நெறிமுறைகள் கோரி மதுரை, சென்னையில் மனுக்கள் தாக்கல் செய்யப்பட்டுள்ளன. மதுரையில் இரு நீதிபதிகளும் சென்னையில் தனி நீதிபதியும் விசாரணை நடத்தி இருக்கிறார்கள். உயர்நீதிமன்ற கிளை விசாரணைக்கு எடுத்த பின், சென்னை உயர்நீதிமன்றம் விசாரிக்க அவசியம் என்ன என்றும் சரமாரியாகக் கேள்விகளை எழுப்பினர்.
தொடர்ந்து, கரூர் கூட்ட நெரிசலில் பாதிக்கப்பட்டவர்களை, உயிரிழந்தவர்களின் உறவினர்களை விஜய் இன்றுவரை சென்று பார்க்கவில்லை என தமிழக அரசு கூறியிருந்தது.
விஜய் கரூர் சென்றாரா, இல்லையா என்பது வழக்குத் தொடர்பில்லாதது. வுழிகாட்டும் நெறிமுறைகளை வகுக்கும் வழக்கு உள்ளபோது மற்ற மனுக்களில் உயர்நீதிமன்றம் எப்படி உத்தரவிட்டது என்றும் உச்சநீதிமன்றம் கேள்வி எழுப்பியது.
Comments are closed.