பிகார் சட்டப் பேரவைக்கான தேர்தலில் ராஷ்ட்ரீய ஜனதா தள கட்சி தலைவர் தேஜஸ்வி யாதவ் தனது சொந்த கட்சி வேட்பாளரையே எதிர்த்துப் பிரசாரம் செய்யும் நெருக்கடி நிலை ஏற்பட்டுள்ளது.
பிகார் தேர்தலில் இந்தியா கூட்டணியில் தொகுதி உடன்பாடு இறுதி செய்யப்படவில்லை. இக்குழப்பத்தில் நட்பு போட்டிகள் ஏற்பட்டுள்ளன. கூட்டணியினரே ஒருவருக்கொருவர் எதிராக போட்டியிடுகின்றனர்.
இந்நிலையில், தர்பங்கா கவுரா பவுராம் (Gaura Bauram) தொகுதி யாருக்கு என இறுதி செய்யப்படுவதற்கு முன்பே அப்சல் அலி கான் என்பவரை ராஷ்ட்ரீய ஜனதா தளம் (ஆர்ஜேடி) வேட்பாளராக அறிவித்தது. அதற்கான ஆவணங்களையும் கட்சி தலைமை வழங்கியது. இதனால் மகிழ்ச்சி அடைந்த அப்சல் அலி கான் பிரசாரம் செய்ய தொகுதிக்கு சென்றார்.
அப்போது அவரது தொகுதி கூட்டணியில் உள்ள விகாஷீல் இன்சான் கட்சிக்கு ஒதுக்கப்பட்டுள்ளதாக தகவல் வந்தது. அக் கட்சி வேட்பாளர் சந்தோஷ் சாகினியை இந்தியா கூட்டணி ஆதரிக்கும் என்றும் தெரிவிக்கப்பட்டது.
எனவே, ராஷ்ட்ரீய ஜனதா தளம் தலைமை அப்சல் கானை தொடர்ப கொண்டு கட்சி சின்னத்தின் ஆவணத்தை திருப்பி தருமாறு கேட்டனர். ஆனால், அவர் திருப்பி தர மறுத்துவிட்டதோடு ராஷ்ட்ரீய ஜனதா தள கட்சியின் வேட்பாளராக மனு தாக்கல் செய்தார்.
அப்சல் அலிகானை தாங்கள் ஆதரிக்கவில்லை என ஆர்ஜேடி தெரிவித்தது. ஆனால், முறையான ஆவணங்களுடன் அவர் வேட்பு மனு தாக்கல் செய்திருப்பதால் அவரது மனுவை நிராகரிக்க முடியாது என தேர்தல் அதிகாரிகள் கூறிவிட்டனர்.
இதனால் அத் தொகுதியில் தனது கட்சி வேட்பாளரை எதிர்த்து பிரசாரம் செய்ய வேண்டிய நெருக்கடி ஆர்ஜேடி தலைவர் தேஜஸ்வி யாதவ்க்கு ஏற்பட்டுள்ளது.
Comments are closed.