‘இறந்தவர்களுடன்’ தேநீர் அருந்தும் வாய்ப்பு தந்த தேர்தல் ஆணையத்துக்கு நன்றி: ராகுல் கிண்டல்!

தேர்தல் ஆணையத்தால் ‘இறந்தவர்கள்’ எனக்கூறி பிகார் வாக்காளர் பட்டியலில் இருந்து பெயர் நீக்கப்பட்டவர்களை எதிர்க்கட்சித் தலைவர் ராகுல் காந்தி சந்தித்துப் பேசியதுடன், ‘இறந்தவர்களுடன்’ தேநீர் அருந்தும் வாய்ப்பு தந்தமைக்கு தேர்தல் ஆணையத்துக்கு நன்றி’ என அவர் தனது எக்ஸ் தள பக்கத்தில் கிண்டலாக பதிவிட்டுள்ளார்.

இதுகுறித்து அவர் தனது எக்ஸ் பக்கத்தில், “வாழ்க்கையில் பல சுவாரஸ்யமான அனுபவங்கள் இருந்திருக்கின்றன. ஆனால், ‘இறந்தவர்களுடன்’ தேநீர் அருந்தும் வாய்ப்பு எனக்கு கிடைத்ததில்லை.
இத் தனித்துவமான வாய்ப்பு தந்தமைக்கு தேர்தல் ஆணையத்துக்கு நன்றி!” எனக் கிண்டலாக பதிவிட்டுள்ளார்.

பிகார் மாநிலத்தில் ஆர்ஜெடி கட்சித் தலைவரான தேஜஸ்வி யாதவின் ரகோபூர் தொகுதியைச் சேர்ந்த ரமிக்பால் ரே, ஹரேந்திர ரே, லால்முனி தேவி, வச்சியா தேவி, லால்வதி தேவி, பூனம் குமாரி, முன்னா குமார் ஆகியோர் சிறப்பு தீவிர திருத்தத்திற்கான ஆவணங்களைப் பூர்த்தி செய்து அளித்திருந்தும் அவர்கள் அனைவரின் பெயர்களும் வாக்காளர் பட்டியலில் இருந்து நீக்கப்பட்டுள்ளதாக காங்கிரஸ் தெரிவித்துள்ளது.