நாடாளுமன்றத்தில் இருந்து தேர்தல் ஆணையம் நோக்கி பேரணியாகச் செல்ல முயன்ற எதிர்க்கட்சித் தலைவர் ராகுல் காந்தி, பிரியங்கா காந்தி மற்றும் எம்.பி.க்கள் கைது செய்யப்பட்டனர்.
மகாராஷ்டிரம், கர்நாடகம் உள்ளிட்ட பல்வேறு மாநிலங்களிலும் வாக்காளர் பட்டியலில் நடைபெற்ற மோசடிகள் குறித்து கடந்த வாரம் செய்தியாளர்கள் சந்திப்பின்போது மக்களவை எதிர்க்கட்சித் தலைவர் ராகுல் காந்தி உரிய ஆதாரங்களுடன் வெளியிட்டிருந்தார்.
இதையடுத்து, பாஜக அரசுடன் சேர்ந்து கொண்டு தேர்தல் ஆணையம் வாக்கு திருட்டில் ஈடுபடுவதாக கடும் குற்றச்சாட்டுகள் எழுந்தன.
இன்று காலை வழக்கம்போல நாடாளுமன்றம் கூடிய நிலையில் ராகுல் காந்தி தலைமையில் எதிர்க்கட்சி எம்.பி.க்கள் தேர்தல் ஆணையம் நோக்கி பேரணியாகப் புறப்பட்டனர். 25 கட்சிகளைச் சேர்ந்த எம்.பி.க்கள் பேரணியாகப் புறப்பட்ட நிலையில், அவர்களை காவல்துறையினர் தடுப்புகள் அமைத்து தடுத்து நிறுத்தினர்.
அனைவரையும் கலைந்து செல்லுமாறு காவல்துறையினர் அறிவுறுத்தினர்.
இந்நிலையில், தடுப்புகள் மீது ஏறிச் செல்ல அகிலேஷ் யாதவ் உள்ளிட்ட எம்.பி.க்கள் முயன்றதால் அங்கு பரபரப்பு ஏற்பட்டது. தமிழக எம்.பி.க்கள் கனிமொழி, டி.ஆர்.பாலு, துரை வைகோ. சு.வெங்கடேசன் உள்ளிட்டோர் இப்பேரணியில் பங்கேற்றனர்.
காவல்துறையினரின் அறிவுறுத்தலை ஏற்று கலைந்து செல்ல மறுத்த எதிர்க்கட்சித் தலைவர் ராகுல் காந்தி, பிரியங்கா காந்தி, சஞ்சய் ராவத், ரன்தீப் சுர்ஜேவாலா உள்ளிட்டோர் கைது செய்யப்பட்டனர்.
Comments are closed.