அசுத்தமான குளங்களில் குளிக்காதீங்க!

மூளையைத் தின்னும் அமீபா வைரஸ் தாக்குதலைத் தடுக்கும் முன்னெச்சரிக்கை நடவடிக்கையாக, தமிழகத்தில் அசுத்தமான நீர் உள்ள குளங்களில் பொதுமக்கள் குளிக்கக் கூடாது என பொது சுகாதாரத்துறை அறிவுறுத்தியுள்ளது.

மூளையைத் தின்னும் அமீபா வைரஸ் தாக்கம் கேரளாவில் அதிகரித்து வருகிறது. அசுத்தமான நீரில் குளிப்பதால் இதுபோன்ற பாதிப்புகள் ஏற்படுகின்றன. இந்நிலையில், தமிழகத்தில் முன்னெச்சரிக்கை நடவடிக்கைகளை பொது சுகாதாரத்துறை மேற்கொண்டு வருகிறது.

இதுகுறித்து பொது சுகாதாரத்துறை இயக்குநர் சோமசுந்தரம், அனைத்து உள்ளாட்சி அமைப்புகளுக்கும் அறிவுறுத்தல்களை வழங்கியுள்ளார்.

அதில் அவர் கூறியிருப்பதாவது:

அசுத்தமான குளங்களில் பொதுமக்கள், குறிப்பாக குழந்தைகள் குளிக்க, அனுமதி வழங்கக்கூடாது. குளங்கள் தூய்மையாக இருப்பதை உறுதி செய்ய வேண்டும்.

தனியார் மற்றும் அரசு நீச்சல் குளங்களில் தண்ணீரில் குளோரின் அளவு சரியாக கலக்கப்பட்டு உள்ளதா என்பதை கண்காணிக்க வேண்டும். காய்ச்சல், வாந்தி, மயக்கத்துடன், மூளை அழற்சி பாதிப்புடன் மருத்துவமனைக்கு வருபவர்களை தீவிரமாகக் கண்காணிக்க வேண்டும் என பொது சுகாதராத்துறை இயக்குநர் அறிவுறுத்தியுள்ளார்.