பிரபல இந்தி நடிகர் தர்மேந்திரா மறைவு

பாலிவுட்டின் பழம்பெரும் நடிகர் தர்மேந்திரா உடல்நலக் குறைவால் அவரது வீட்டில் இன்று காலமானார். அவருக்கு வயது 89.

பாலிவுட் திரையுலகில் நட்சத்திரமாக ஜொலித்த தர்மேந்திரா, இதய கோளாறு மற்றும் மூச்சுவிடுவதில் சிரமம் காரணமாக மும்பையில் உள்ள ப்ரீச் கேன்டி மருத்துவமனையில் அனுமதிக்கப்பட்டு நீண்ட நாள்களாக சிகிச்சைப் பெற்று வந்தார்.

இதனிடையே, அண்மையில் அவர் உடல்நலக் குறைவால் காலமானதாக சமூக வலைதளங்களில் வதந்திகள் பரவியதைத் தொடர்ந்து, தர்மேந்திரா நலமுடன் இருப்பதாக அவரது மனைவியும் எம்.பி.யுமான ஹேமமாலினி, அவரது மகள் நடிகை ஈஷா தியோல் ஆகியோர் உறுதிப்படுத்தியதுடன் தர்மேந்திராவை அவரது வீட்டிற்கு அழைத்துச் சென்றனர்.

இந்நிலையில், வீட்டிலேயே சிகிச்சைப் பெற்று வந்த தர்மேந்திரா இன்று உடலநலக் குறைவால் உயிரிழந்தார். இதை பாலிவுட் இயக்குநர் மற்றும் தயாரிப்பாளர் கரண் ஜோஹர் தனது எக்ஸ் தள பக்கத்தில் பதிவிட்டு உறுதி செய்துள்ளார்.

தர்மேந்திரா மறைவுக்கு நடிகர் அமிதாபச்சன், நடிகர் அபிஷேக் பச்சன் உள்ளிட்ட முக்கிய பிரபலங்கள் நேரில் அஞ்சலி செலுத்தி வருகின்றனர்.