திருச்சியில் விஜய் பிரசாரத்தின்போது பொது சொத்துகளை சேதப்படுத்தியதாக 5 தவெக நிர்வாகிகள் மீது வழக்குப்பதிவு!

தமிழக வெற்றிக்கழகத் தலைவர் விஜய் பிரசாரத்தின்போது திருச்சியில் அரசு மற்றும் தனியார் சொத்துக்களை சேதப்படுத்தியதாகக் கூறி 5 நிர்வாகிகள் மீது போலீஸார் வழக்குப் பதிவு செய்துள்ளனர்.

தவெக தலைவர் விஜய் தனது அரசியல் பிரவேசத்திற்கு பின், முதல் சுற்றுப்பயணத்தை செப்.13ஆம் தேதி திருச்சியில் இருந்து தொடங்கினார். இதில் கூடிய கூட்டம் திருச்சியை குலுங்க வைத்தது.

திருச்சி விமான நிலையத்தில் இருந்து பிரசாரம் நடந்த மரக்கடை வரையிலான 8 கி.மீ. தூரத்தைக் கடக்க சுமார் 5 மணிநேரம் ஆனது. இந்நிலையில் தற்போது விஜய் பிரசாரத்தின்போது மாநில அரசு மற்றும் தனியார் சொத்துக்களை சேதப்படுத்தியதாக அக்கட்சியின் 5 நிர்வாகிகள் மீது போலீஸார் வழக்குப் பதிவு செய்துள்ளனர்.

டிவிஎஸ் டோல்கேட் மேம்பாலத்திற்கு கீழே அழுகுபடுத்தப்பட்ட இடத்தை பாதுகாக்க அமைத்திருந்த துருப் பிடிக்காத எக்கு வேலி தவெக தொண்டர்களால் சேதப்படுத்தப்பட்டதாக திருச்சி மாநகராட்சியின் அரியமங்கலம் இளைநிலை பொறியாளர் திவாகர் அளித்த புகாரின் அடிப்படையில் போலீஸார் இவ் வழக்கைப் பதிவு செய்துள்ளனர்.

இதன் மூலம் மாநகராட்சிக்கு ரூ.1.4 லட்சம் இழப்பு ஏற்பட்டுள்ளதாக போலீஸார் மதிப்பிட்டுள்ளனர்.

மேலும், காந்தி மார்க்கெட் அருகிலுள்ள மரக்கடையில் பிரசாரம் நடைபெற்ற பகுதியில், மர தளவாடங்கள் மற்றும் ஒரு சரக்கு வாகனம் உள்பட ரூ.1.3 லட்சம் மதிப்புள்ள சொத்துக்களை அடையாளம் தெரியாத தவெக தொண்டர்கள் சேதப்படுத்தியதாக தென்னூரைச் சேர்ந்த எஸ்.ரவிச்சந்திரன் என்ற வியாபாரி புகார் அளித்துள்ளார்.

தனது கடையின் மேல் நின்றுகொண்டிருந்த தவெக தொண்டர்களை கீழே இறங்கச் சொன்னபோது, தன்னை ஆபாச வார்த்தைகளால் திட்டியதாக ரவிச்சந்திரன் அப்புகாரில் தெரிவித்துள்ளார். அவரது புகாரின்பேரில், காந்தி மார்க்கெட் காவல் நிலைய போலீஸார் வழக்குப் பதிவு செய்து விசாரணை மேற்கொண்டு வருகின்றனர்.