காங்.கூட்டணியில் இருந்தபோது நடைபெற்ற எஸ்ஐஆர்-ஐ ஏன் எதிர்க்கவில்லை? திமுகவுக்கு நிர்மலா சீதாராமன் கேள்வி

வாக்காளர் பட்டியல் சிறப்பு தீவிர திருத்த (எஸ்ஐஆர்) நடவடிக்கையால் யாருடைய வாக்குரிமையும் பறிபோகாது என மத்திய நிதித்துறை அமைச்சர் நிர்மலா சீதாராமன் தெரிவித்துள்ளார்.

காங்கிரஸ் கூட்டணியில் மத்திய அரசோடு திமுக இணக்கமாக இருந்தபோது நடைபெற்ற எஸ்ஐஆரை ஏன் எதிர்க்கவில்லை எனவும் அவர் கேள்வி எழுப்பியுள்ளார்.
கோவை கோட்ட பாஜக நிர்வாகிகள் கூட்டம் முதலிபாளையத்தில் செவ்வாய்க்கிழமை நடைபெற்றது. இதில் கலந்து கொண்ட நிர்மலா சீதாராமன் செய்தியாளர்களிடம் கூறியதாவது:

தேர்தல் ஆணையத்தின் வாக்காளர் பட்டியல் சிறப்பு தீவிர திருத்தப் பணிகள் (எஸ்ஐஆர்) நடவடிக்கை ஏதோ பாஜகவால் அறிமுகம் செய்யப்பட்டதைப்போல, தமிழகத்தில் திமுக அரசு எதிர்த்து போராட்டங்களை நடத்தி வருகிறது.

1952 முதல் 2004ஆம் ஆண்டு வரை வாக்காளர் பட்டியல் சிறப்பு தீவிர திருத்தப் பணிகள் 13 முறை நடைபெற்றுள்ளன. காங்கிரஸ் கூட்;டணியில் மத்திய அரசோடு திமுக இணக்கமாக இருந்தபோது நடைபெற்ற எஸ்ஐஆர்-ஐ ஏன் எதிர்க்கவில்லை?

இது மக்களின் வாக்களிக்கும் உரிமையைப் பறிக்கும் முயற்சி எனவும், சூழ்ச்சி எனவும் முதல்வர் மு.க.ஸ்டாலின் தெரிவிக்கிறார்.உயிரிழந்தவர்கள் மற்றும் முகவரி மாறியவர்களைப் பட்டியலில் இருந்து நீக்கிடவும், சரியான முகவரியில் இருப்பவர்களைப் பட்டியலில் சேர்த்திடவும்தான் இந் நடவடிக்கை மேற்கொள்ளப்படுகிறது.

எஸ்ஐஆர் நடவடிக்கையால் யாருடைய வாக்குரிமையும் பறிபோகாது. ஓவ்வொரு தேர்தலுக்கு முன்பும் செய்ய வேண்டிய கடமையைத்தான் தேர்தல் ஆணையம் செய்து வருகிறது. இதற்கு சட்டரீதியாக தேர்தல் ஆணையத்துக்கு முழு உரிமையும் உண்டு என அமைச்சர் நிர்மலா சீதாராமன் கூறினார்.

அரசின் தோல்விகளை மறைக்கவும், மடைமாற்றம் செய்யவும் எஸ்ஐஆர் எதிர்ப்பு உத்தியை திமுக கையில் எடுத்துள்ளது எனவும் அவர் குற்றஞ்சாட்டினார்.