திமுக அரசு தான் காரணம்: நயினார் நாகேந்திரன்

நெல்லில் ஈரப்பதம் அதிகரிக்க திமுக அரசு தான் காரணம் என தமிழக பாஜக தலைவர் நயினார் நாகேந்திரன் தெரிவித்துள்ளார்.

திருச்சி பாஜக அலுவலகத்தில் வாக்காளர் பட்டியல் சிறப்பு திருத்தம் குறித்த ஆலோசனைக் கூட்டம் நடைபெற்றது. அதில் தமிழக பாஜக தலைவர் நயினார் நாகேந்திரன், முன்னாள் தலைவர் அண்ணாமலை, தேசிய பொதுச் செயலாளர் தருண் சக், மாநில பொருப்பாளர் அரவிந்த் மேனன் உள்ளிட்டோர் பங்கேற்றனர்.

பின்னர், செய்தியாளர்களிடம் பேசிய நயினார் நாகேந்திரன், தன்னை காவிரி டெல்டாக்காரன் என கூறிக் கொள்ளும் முதல்வர் ஸ்டாலின், விவசாயிகளை வஞ்சிப்பதாக குற்றஞ்சாட்டினார்.

நெல்லில் ஈரப்பதம் அதிகரிக்க திமுக அரசு தான் காரணம். அறுவடையின்போது கொள்முதல் செய்ய வேண்டியது தமிழக அரசு பொறுப்பு. நெல்லை பாதுகாப்பாக வைக்க சேமிப்பு கிடங்குகளை ஏற்படுத்தவில்லை. மழையில் நெல்லை நனையவிட்டு, அவற்றை முளைக்கவிட்டு, அதன் பின், இழப்பீடு தாருங்கள் என்று கேட்பதில் என்ன நியாயம் இருக்கிறது?

இதற்கு முழுக்க முழுக்க ஸ்டாலின் தான் பொறுப்பு. மத்திய அரசு இல்லை என்றார் நயினார் நாகேந்திரன்.