கோடியக்கரை அருகே கடலில் மீன் பிடித்துக் கொண்டிருந்த தமிழக மீனவர்களை இலங்கை கடற் கொள்ளையர்கள் தாக்கி, மோட்டார் இன்ஜின், ஜிபிஎஸ் கருவி, இகோ சவுண்டர், செல்ஃபோன்கள், மீன்பிடி வலை உள்ளிட்ட பொருள்களை கொள்ளையடித்துச் சென்றுவிட்டனர்.
இத் தாக்குதலில் படுகாயமடைந்த 11 மீனவர்கள் ஒரத்தூர் அரசு மருத்துவக் கல்லூரி மருத்துவமனையில் அனுமதிக்கப்பட்டுள்ளனர். இச் சம்பவம் கடலோர மீனவக் கிராமங்களில் பெரும் அதிர்ச்சியை ஏற்படுத்தியுள்ளது.
நாகை நம்பியார் நகர் பகுதியைச் சேர்ந்த சந்திரபாபு (60) என்வருக்குச் சொந்தமான ஃபைபர் படகில் அதே பகுதியைச் சேர்ந்த முருகன் (38), அருண் (27), சுகுமார் (31), திருமுருகன் (31), விக்னேஷ் (28), விமல் (26) ஆகிய 6 பேரும் மீன் பிடிக்க நேற்று மதியம் 2 மணிக்கு கடலுக்கு சென்றனர்.
இவர்கள் அனைவரும் இரவு 8 மணியளவில் கோடியக்கரை பகுதியில் நடுக்கடலில் மீன் பிடித்துக் கொண்டிருந்தபோது, அங்கே 2 படகுகளில் வந்த இலங்கை கடற்கொள்ளையர்கள் 8 பேர் கத்தி, இரும்புக் கம்பி உள்ளிட்ட ஆயுதங்களால் மீனவர்களைத் தாக்கி அவர்களிடமிருந்த வெள்ளிச் செயின், மோட்டார் இன்ஜின், ஜிபிஎஸ் கருவி, பேட்டரி, வாக்கி டாக்கி, செல்ஃபோன்கள் ஆகியவற்றைப் பறித்துச் சென்றுவிட்டனர்.
இத் தாக்குதலில் காயமடைந்த 6 மீனவர்களும் இன்று அதிகாலை 4 மணிக்கு கரை திரும்பி, நாகை கடலோர பாதுகாப்பு குழும காவல் நிலையத்தில் புகார் செய்தனர். காயமடைந்த 6 பேரும் ஒரத்தூர் அரசு மருத்துவக் கல்லூரி மருத்துவமனையில் அனுமதிக்கப்பட்டு சிகிச்சைப்பெற்று வருகின்றனர்.
மற்றொரு சம்பவத்தில், நம்பியார் நகர் பகுதியைச் சேர்ந்த சசிகுமார் என்பவருக்குச் சொந்தமான ஃபைபர் படகில் கோடியக்கரைக்கு கிழக்கே நடுக்கடலில் மீன் பிடித்துக் கொண்டிருந்த சசிகுமார் (30), உதயசங்கர் (28), சிவசங்கர் (25), கிருபா (29), கமலேஷ் (19) ஆகிய 5 மீனவர்களை 2 படகுகளில் வந்த இலங்கை கடற் கொள்ளையர்கள் 8 பேர் அவர்களிடமிருந்த மோட்டார் இன்ஜின், ஜிபிஎஸ் கருவி, இகோ சவுண்டர், செல்ஃபோன்கள், மீன்பிடி வலை உள்ளிட்ட பொருள்களை கொள்ளையடித்துச் சென்றுவிட்டனர்.
அதைத் தொடர்ந்து இன்று அதிகாலை கரை திரும்பிய மீனவர்கள் இதுகுறித்து நாகை கடலோர பாதுகாப்பு குழும காவல்துறையில் புகார் அளித்தனர். காயமடைந்த 5 மீனவர்களும் ஒரத்தூர் அரசு மருத்துவக் கல்லூரி மருத்துவமனiயில் அனுமதிக்கப்பட்டு சிகிச்சைப்பெற்று வருகின்றனர்.
Comments are closed.