எண்ணூரில் நடைபெற்ற கொலை வழக்கில் 21 ஆண்டுகளாக தலைமறைவாக இருந்துவந்த கொலயாளியை எஸ்ஐஆர் படிவத்தை வைத்து அவரது இருப்பிடத்தைக் கண்டுபிடித்து போலீஸார் கைது செய்துள்ளனர்.
சென்னை எண்ணூர் இந்திரா நகரைச் சேர்ந்தவர் ரபீக் (57). இவரது மனைவி ரசூல் பீவி.
ரபீக் சுமார் 21 ஆண்டுகளுக்கு முன்பு, கடந்த 2004 மே 24ஆம் தேதியன்று, தனது வீட்டில் தாஜுதீன் என்ற நண்பருடன் மது அருந்தியுள்ளார். அப்போது ரசூல் பீவி குறித்து தாஜுதீன் தவறாகப் பேசியதால் ஆத்திரமடைந்த ரபீக், அவரை கழுத்தை அறுத்து கொலை செய்துவிட்டு தலைமறைவாகிவிட்டார்.
இதுகுறித்து எண்ணூர் காவல் நிலைய போலீஸார் வழக்குப்பதிந்து, தலைமறைவான ரபீக்கை தேடி வந்தனர். அவரது இருப்பிடம் குறித்து எந்த தகவலும் கிடைக்கவில்லை.
இந்நிலையில், உயரதிகாரிகளின் உத்தரவின்பேரில், இரண்டு தனிப்படைகள் அமைக்கப்பட்டு, வாக்காளர் பட்டியல் வழியாக ரபீக்கை போலீஸார் தேட முயற்சி மேற்கொண்டனர்.
முதற்கட்ட விசாரணையில், ரபீக்கின் இயற்பெயர் ராஜேந்திரன் என்பதும், இவரது தந்தை பெயர் பரமசிவம், கடலூர் ஆக்கனூர் பகுதியைச் சேர்ந்தவர் என்பதும் தெரிய வந்தது.
இந்த ஆதாரங்களை வைத்து, தனிப்படை போலீஸார் சாதாரண உடையில், எஸ்ஐஆர் படிவத்திற்கான விபரங்கள் கோருவதுபோல விசாரணை மேற்கொண்டனர். அதில், புகைப்படம் மூலம் குற்றவாளியை அடையாளம் கண்டனர்.
கொலைக்கு பின்னர், ரபீக் நிரந்தரமாக எங்கும் தங்காமல் அரியலூர், ஜெயங்கொண்டம், சேலம் உள்ளிட்ட பல்வேறு நகரங்களில் கடைகளில் சாம்பிராணி புகை போட்டு பிழைப்பு நடத்தி வந்துள்ளார். தற்போது பெங்களுருவில் தங்கியுள்ளார் என்பதும், இரவு வேளைகளில் பேருந்து நிலையத்தில் படுத்து உறங்குவதை வழக்கமாக கொண்டுள்ளார் என்பதும் போலீஸாரின் விசாரணையில் தெரிய வந்தது.
இதையடுத்து தனிப்படை போலீஸார், அங்கு சென்று மக்களோடு மக்களாக தங்கி, பெங்களுரு மாவட்டம் மடிவாலா சந்தை பகுதியில் ரபீக்கை கைது செய்தனர்.
Comments are closed.