வாடிக்கையாளருக்கு தயாரிப்பு குறைபாடுடைய கார் வழங்கிய மாருதி சுசுகி நிறுவனம், கார் விலையுடன் ரூ.2,19,800 இழப்பீடாக வழங்க வேண்டும் என திருவாரூர் நுகர்வோர் குறைதீர் ஆணையம் உத்தரவிட்டுள்ளது.
மன்னார்குடி மதுக்கூர் சாலையில் வசிக்கும் கருணாநிதி (70) என்பவர் கடந்த 2024ஆம் ஆண்டு தஞ்சாவூரில் உள்ள மாருதி நிறுவன முகவரிடமிருந்து மாருதி செலரியோ காரை ரூ.6,59,447-க்கு வாங்கியுள்ளார். மேலும் ரூ.10,280 செலுத்தினால் வாகனத்துடன் 2 ஆண்டு வாரண்டியுடன் கூடுதலாக 3 ஆண்டுகளுக்கு அல்லது ஒரு லட்சம் கிலோ மீட்டர் வரை கூடுதல் வாரண்டி வழங்கப்படும் என மாருதி முகவர் கூறியதன்பேரில், கருணாநிதி ரூ.10,280 செலுத்தி கூடுதல் வாரண்டியும் பெற்றார்.
காரை ஓட்டிப் பார்த்தபோது இயந்திரப் பகுதியில் கூடுதல் இரைச்சல் கேட்டுள்ளது. இதுகுறித்து கார் வாங்கிய நாளன்றே, மாருதி சுசுகி நிறுவன வாடிக்கையாளர் சேவைப் பிரிவுக்கு மின்னஞ்சல் அனுப்பிவிட்டு, ஒரு மாதம் கழித்து, முதல் இலவச பழுது நீக்கத்துக்காக முகவரின் நிறுவனத்துக்கு காரை கொண்டு சென்றுள்ளார் கருணாநிதி. அங்கு பணியாளர், காரை ஆய்வு செய்துவிட்டு, இரைச்சல் சரிசெய்யப்பட்டு விட்டதாகக் கூறியுள்ளார்.
இரண்டு முறை பழுதை சரி செய்யக் கொடுத்தும் இரைச்சல் கேட்டுக் கொண்டே இருந்துள்ளது. இதனால், மன உளைச்சலுக்கு உள்ளான கருணாநிதி, கடந்த ஏப்ரல் 28ஆம் தேதி திருவாரூர் நுகர்வோர் குறைதீர் ஆணையத்தில் வழக்குத் தொடர்ந்தார்.
புகாரை விசாரித்த ஆணையம், வழக்குரைஞர் ஒருவரை ஆணையராக கொண்டு, காரை ஆய்வு செய்ய ஒரு அனுபவம் மிக்க கார் மெக்கானிக்கை நியமித்தது. காரை ஆய்வு செய்த மெக்கானிக், இரச்சலுக்கு காரணம் தயாரிப்புக் குறைபாடே என அறிக்கை சமர்ப்பித்தார்.
இதையடுத்து, திருவாரூர் நுகர்வோர் குறைதீர் ஆணையத் தலைவர் மோகன்தாஸ், உறுப்பினர் பாலு ஆகியோர் புதன்கிழமை வழங்கிய உத்தரவில், முகவர் நிறுவனத்தை வழக்கில் இருந்து விடுவித்து, தயாரிப்பு நிறுவனமான மாருதி சுசுகி நிறுவனம் காரை திரும்ப எடுத்துக் கொண்டு, காரின் விலையான ரூ.6,59,447, மன உளைச்சல் ஏற்படுத்தியதற்கு இழப்பீடாகரூ.2,00,000, வழக்கு செலவுத்தொகை மற்றும் ஆணையர், மெக்கானிக் கட்டணமாகரூ.19,800 என மொத்தம் ரூ.2,19,800 வழங்க வேண்டும் என உத்தரவிட்டனர்.
Comments are closed.