படகு பழுதடைந்து இலங்கை கடல் பகுதிக்குள் சென்றதால் கைது செய்யப்பட்ட மல்லிப்பட்டினத்தைச் சேர்ந்த 3 மீனவர்கள் நீதிமன்ற தீர்ப்பின்படி விடுவிக்கப்பட்டு படகுடன் திங்கள்கிழமை இரவு மல்லிப்பட்டினம் வந்தடைந்தனர்.
மல்லிப்பட்டினம் கள்ளிவயல்தோட்டம் பகுதியைச் சேர்ந்த பாயிஸ் அக்ரம் என்பவருக்குச் சொந்தமான நாட்டுப்படகில் முரளி (30), குமார் (32), ராஜா (53) ஆகியோர் கடந்த அக்.16ஆம் தேதி மீன்பிடிக்கச் சென்றனர். படகில் இயந்திரம் பழுதானதால் திசைமாறி இலங்கை கடல் எல்லையான யாழ்ப்பாணம் மாவட்டம் அணலைத் தீவுக்கு சென்ற மீனவர்களை இலங்கை கடற்படையினர் கைது செய்து சிறையில் அடைத்தனர்.
இது தொடர்பான வழக்கு விசாரணையில், மீனவர்கள் மூவரையும் விடுதலை செய்து, அவர்களை படகுடன் பாதுகாப்பாக இந்திய கடல் எல்லையில் விட்டுவர இலங்கைக் கடற்படையினருக்கு ஊர்க்காவல்துறை நீதிமன்றம் நவ.4ஆம் தேதி உத்தரவிட்டது.
இதைத் தொடர்ந்து, திங்கள்கிழமை இரவு இலங்கை கடற்படையினர் 3 மீனவர்களையும் இந்திய கடல் எல்லையில் இந்திய கடற்படையிடம் ஒப்படைத்தனர். அம் மீனவர்களை மீன்வளத்துறை, கடலோர காவல் படையினர் மற்றும் மீனவர் நல வாரிய துணைத் தலைவர் தாஜுதீன் ஆகியோர் பாதுகாப்பாக மல்லிப்பட்டினம் அழைத்து வந்தனர்.
Comments are closed.