நீதிமன்ற அவமதிப்பு வழக்கு: கரூர் கலெக்டர், எஸ்.பி., ஆஜராக உத்தரவு!

கோயிலுக்குச் சொந்தமான சொத்துகள் ஆக்கிரமிப்பு தொடர்பான நீதிமன்ற ஆக்கிரமிப்பு வழக்கில் அறநிலையத்துறை ஆணையராக இருந்த முரளிதரன், கரூர் மாவட்ட கலெக்டர் தங்கவேல், எஸ்.பி.ஜோஸ் தங்கையா ஆகியோரை அக்.17ஆம் தேதி ஆஜராகுமாறு உயர்நீதிமன்ற மதுரைக் கிளை உத்தரவிட்டுள்ளது.

வெண்ணெய் மலையில் உள்ள பாலசுப்பிரமணிய சுவாமி கோவிலுக்குச் சொந்தமான கத்தப்பாறை, அதூர் பகுதியில் ஆக்கிரமிக்கப்பட்டுள்ள 540 ஏக்கர் நிலத்தை மீட்குமாறு சென்னையைச் சேர்ந்த ராதாகிருஷ்ணன் என்பவர் தாக்கல் செய்திருந்த மனுவை விசாரித்த இரு நீதிபதிகள் கொண்ட அமர்வு, ஆக்கிரமிப்பிலிருந்து அகற்ற நடவடிக்கை கோயில் சொத்துகளை மீட்க நடவடிக்கை எடுக்குமாறு 2019 அக்டோபர் 23ஆம் தேதி உத்தரவிட்டது.

ஆனால், இதுவரை ஆக்கிரமிப்புகள் அகற்றப்படவில்லை. இந்நிலையில், நீதிமன்ற உத்தரவை நிறைவேற்றாத அறநிலையத்துறை முன்னாள் ஆணையர் முரளிதரன், கரூர் மாவட்ட கலெக்டர் தங்கவேல், கோவில் செயல் அலுவலர் சுகுணா ஆகியோர் மீது நீதிமன்ற அவமதிப்பின் கீழ் நடவடிக்கை எடுக்க வேண்டும் என ராதாகிருஷ்ணன் மனு தாக்கல் செய்தார்.

அவரது மனுவை விசாரித்த இரு நீதிபதிகள் கொண்ட அமர்வு, இவ்விவகாரத்தில் மேற்கொண்ட நடவடிக்கை குறித்து அறிக்கை மற்றும் ஆக்கிரமப்பாளர்களின் பட்டியலை அரசு தரப்பில் தாக்கல் செய்ய உத்தரவிட்டது.

நீதிபதிகள் பி.வேல்முருகன், பி.புகழேந்தி கொண்ட அமர்வு மீண்டும் விசாரித்தது. நிலத்தை மேற்கொண்ட நடவடிக்கை குறித்து அறநிலையத்துறை சார்பில் அறிக்கை தாக்கல் செய்யப்பட்டது.

இந்நீதிமன்ற உத்தரவுகளை நிறைவேற்றுவதில் முன்னேற்றம் இல்லை. ஆவணங்கள் மாவட்ட நிர்வாகத்தால் வழங்கப்படவில்லை ஆவணங்கள் கிடைக்காததே தாமதத்திற்கு காரணம் என அறநிலையத்துறை தரப்பு கூறியுள்ளது. கலெக்டர் அலுவலகத்தில் இல்லையெனில் மாவட்ட ஆவணக் காப்பகத்தில் ஆவணங்களை பெறுமாறு அறநிலையத்துறைக்கு நீதிமன்றம் உத்தரவிட்டது.

அரசு தரப்பில் தாக்கல் செய்யப்பட்ட அறிக்கையில், 27 அரசு அலுவலர்கள், 49 தொழிலதிபர்பள், 38 செல்வாக்கு மிக்க நபர்கள் கோயில் நிலத்தை ஆக்கிரமித்துள்ளதாக குறிப்பிடப்பட்டுள்ளது. வருவாய்த்துறையின் சில அதிகாரிகள் மற்றும் கோயில் அறங்காவலர்களின் உடந்தையுடன் ஆக்கிரமிப்புகள் நடந்துள்ளன. கோயில் சொத்துக்களின் சட்டப்பூர்வ பாதுகாவலரான அறநிலையத்துறை அதன் கடமைகளைச் செய்யத் தவறிவிட்டது. செல்வாக்கு மிக்க நபர்கள் ஆக்கிரமித்துள்ளதால், ஆக்கிரமிப்புகளை அகற்றுவதில் மாவட்ட நிர்வாகம் மற்றும் காவல்துறை ஒத்துழைக்கத் தயங்குவதாக தெரிகிறது.

கோயில் நிலத்தை மீட்க பயனுள்ள நடவடிக்கை எடுக்கவில்லை. எனவே, அறநிலையத்துறை ஆணையராக இருந்த முரளிதரன், கரூர் மாவட்ட கலெக்டர் தங்கவேல், கோயில் செயல் அலுவலர் சுகுணா மற்றும் கரூர் எஸ்.பி. ஆகியோர் அக்.17ல் இந்நீதிமன்றத்தில் ஆஜராக வேண்டும் என நீதிபதிகள் உத்தரவிட்டனர்.