முறையாக வழக்கறிஞர் உடை அணியாமல், வீடியோ கான்ஃபரன்ஸ்’ வாயிலாக வழக்கு விசாரணைக்கு ஆஜரான பாஜக மாநில செயலாளரும் வழக்கறிஞருமான அஸ்வத்தாமனுக்கு எதிராக சென்னை உயர்நீதிமன்றம் தாமாக முன்வந்து நீதிமன்ற அவமதிப்பு நடவடிக்கை எடுத்துள்ளது.
நாகப்பட்டினம் மாவட்டம் தலைஞாயிறு பேரூராட்சி அலுவலக இளநிலைப் பொறியாளர் ரமேஷ், உதவி செயற்பொறியாளர் தியாகராஜன் என்பவருடன், கடந்த ஜுலை 19 ஆம் தேதி, ஞானாம்பாள் கோவில் தெருவில் உள்ள செப்பனிடப்பட்ட சாலையை அளவீடு செய்ய சென்றுள்ளார்.
அப்போது அங்கு வந்த பேரூராட்சி துணைத் தலைவர் கதிரவன், பேரூராட்சி அனுமதி இல்லாத சாலை ஒன்றை அளவீடு செய்யுமாறு இளநிலைப் பொறியாளர் ரமேஷை வற்புறுத்தியுள்ளார். இதற்கு மறுப்பு தெரிவித்த இளநிலைப் பொறியாளர் ரமேஷ் மீது கதிரவன் தனது மோட்டார் சைக்கிளை மோதியுள்ளார். இச்சம்பவத்தில் படுகாயமடைந்த ரமேஷ் அளித்த புகாரின்பேரில், தலைஞாயிறு காவல் நிலைய போலீஸார் வழக்குப்பதிவு செய்து விசாரணை மேற்கொண்டு வருகின்றனர்.
இந்நிலையில், இவ்வழக்கில் முன் ஜாமீன் வழங்கக்கோரி, சென்னை உயர்நீதிமன்றத்தில் கதிரவரன் மனு தாக்கல் செய்தார்.
இம் மனு நீதிபதி கே.ராஜசேகர் முன் நேற்று விசாரணைக்கு வந்தது. அப்போது, மனுதாரர் சார்பில் ‘காணொலி காட்சி’ வாயிலாக வழக்கறிஞர் அஸ்வத்தாமன் ஆஜரானார். அவர் வழக்கறிஞருக்கான உடை அணியாமல், வெள்ளை சட்டை மட்டும் அணிந்து இருந்தார்.
அதைக் கவனித்த நீதிபதி, ‘நீதிமன்றத்தில் கண்ணியத்துடன் ஆஜராக வேண்டாமா? ஏந்த உடையுடன் ஆஜராக வேண்டும் என்பது தெரியாதா?’ எனக் கேள்வி எழுப்பி, அஸ்வத்தாமனின் செயலுக்கு வருத்தம் தெரிவித்தார்.
அதற்கு, ‘தோளில் ஏற்பட்ட காயம் காரணமாக மருத்துவ சிகிச்சையில் உள்ளதால் வழக்கறிஞர் உடை அணியாமல் விசாரணைக்கு ஆஜரானதாக’ அஸ்வத்தாமன் தெரிவித்தார்.
அவரது விளக்கத்தை ஏற்க மறுத்த நீதிபதி ராஜசேகர், இது தொடர்பாக வழக்கறிஞர் அஸ்வத்தாமன் மீது, நீதிமன்ற அவமதிப்பு வழக்கு எடுப்பதாகவும், வரும் 22ஆம் தேதி அவர் நேரி;ல் ஆஜராகி விளக்கம் அளிக்க வேண்டும் எனவும் உத்தரவிட்டு, விசாரணையை தள்ளி வைத்தார்.
Comments are closed.