‘குட் பேட் அக்லி’ படத்தில் இளைராஜா பாடல்களை பயன்படுத்த தடை!

நடிகர் அஜித்குமார் நடித்து தற்போது வெளியாகியுள்ள ‘குட் பேட் அக்லி’ திரைப்படத்தில் இசையமைப்பாளர் இளையராஜாவின் பாடல்களை பயன்படுத்த சென்னை உயர் நீதிமன்றம் இடைக்கால தடை விதித்துள்ளது.

மைத்திரி மூவி மேக்கர்ஸ் தயாரிப்பில் நடிகர் அஜித் உள்ளிட்டோர் நடித்துள்ள ‘குட் பேட் அக்லி’ திரைப்படம் அண்மையில் வெளியானது.

இப் படத்தில் ‘ஒத்த ரூபாயும் தாரேன்’, ‘இளமை இதோ இதோ’, ‘என் ஜோடி மஞ்சக்குருவி’ ஆகிய பாடல்கள் இளையராஜாவின் அனுமதியில்லாமல் பயன்படுத்தப்பட்டுள்ளன.

அனுமதியின்றி அவரது பாடல்களை பயன்படுத்துவது பதிப்புரிமைச் சட்டத்துக்கு எதிரானது. எனவே அப் பாடல்களை பயன்படுத்த தடை விதித்து, அவற்றை நீக்க வேண்டும். பாடல்களை பயன்படுத்தியதற்கு உரிய இழப்பீடு தர வேண்டும் என இசையமைப்பாளர் இளையராஜா சார்பில் சென்னை உயர்நீதிமன்றத்தில் மனு அளிக்கப்பட்டது.

இவ் வழக்கை இன்று விசாரணைக்கு எடுத்த சென்னை உயர்நீதிமன்றம், குட் பேட் அக்லி படத்தில் இளையராஜாவின் பாடல்களை பயன்படுத்துவதற்கு இடைக்கால தடை விதித்து உத்தரவிட்டது.

மேலும், இவ் வழக்கு தொடர்பாக தயாரிப்பு நிறுவனம் பதிலளிக்க உத்தரவிட்டு, வழக்கின் விசாரணையை இரண்டு வாரங்களுக்கு நீதிமன்றம் ஒத்திவைத்தது.