மத்திய அரசின் பி.எம்.ஸ்ரீ கல்வி திட்டத்தை இதுவரை கடுமையாக எதிர்த்துவந்த மார்க்சிஸ்ட் கம்யூனிஸ்ட் கட்சி தலைமையிலான கேரள அரசு தற்போது ‘அந்தர் பல்டி’ அடித்து அத் திட்டத்தை ஏற்றுள்ளது.
கேரளாவில் அத் திட்டத்தை கொண்டுவர சம்மதித்து மத்திய அரசுடனான புரிந்துணர்வு ஒப்பந்தத்தில் கேரள கல்வித்துறை செயலாளர் கையெழுத்திட்டுள்ளார்.
மத்திய அரசு கடந்த 2022ஆம் ஆண்டு முதல் பி.எம்.ஸ்ரீ கல்வி திட்டத்தைக் கொண்டு வந்தது. இதில் தமிழ்நாடு, கேரளா, மேற்கு வங்காளம், பஞ்சாப் உள்ளிட்ட சில மாநிலங்கள் இணைய தொடர்ந்து மறுத்தன.
இதனால் மத்திய அரசு மாநிலங்களுக்கு ஒதுக்கப்படும் எஸ்.எஸ்.ஏ திட்டத்திற்கு அனுப்ப வேண்டிய நிதியை நிறுத்தி வைத்தது. இத் திட்டத்தை ஏற்றால்தான் நிதி என்றால், அந் நிதியே வேண்டாம் என தமிழக அரசு காட்டமாக பதிலடி கொடுத்துள்ளது. இதே நிலையை கேரளாவில் ஆளும் மார்க்சிஸ்ட் கம்யூனிஸ்ட் கட்சியும் பின்பற்றியது.
இந்நிலையில், மார்க்சிஸட் கம்யூனிஸ்ட் அரசு திடீரென ‘அந்தர் பல்டி’ அடித்து கேரளாவில் பி.எம்.ஸ்ரீ திட்டத்தை கொண்டுவர சம்மதித்துள்ளது. பி.எம்.ஸ்ரீ திட்டத்துக்கான மத்திய அரசுடனான புரிந்துணர்வு ஒப்பந்தத்தில் கேரள கல்வித்துறை செயலாளர் கையெழுத்திட்டுள்ளார்.
மார்க்சிஸ்ட் கம்யூனிஸ்ட் கட்சியின் இச்செயலுக்கு அதன் கூட்டணி கட்சியான இந்திய கம்யூனிஸ்ட் கட்சி கடும் எதிர்ப்பு தெரிவித்துள்ளது.
“பாஜகவுடன் மார்க்சிஸ்ட் கம்யூனிஸ்ட் கட்சி மறைமுக கூட்டணி வைத்துள்ளது பி.எம.ஸ்ரீ திட்டத்தின் மூலம் வெளிச்சத்துக்கு வந்துள்ளது” என எதிர்க்கட்சியான காங்கிரஸ் குற்றஞ்சாட்டியுள்ளது.
இந்திய கம்யூனிஸ்ட் கட்சியின் மாநிலச் செயலாளர் பினோய் விஸ்வம் கூறுகையில், “ இச் செய்தி உண்மையானால் அது கூட்டணி தர்மத்துக்கு எதிரானது. இது தொடர்பாக, இடது முன்னணியில் அனைத்து கட்சிகளுடன்; ஆலோசிக்கப்பட வேண்டும். மார்க்சிஸ்ட் கம்யூனிஸ்ட் கட்சியின் தேசிய பொதுச் செயலாளர் எம்.ஏ.பேபியின் கருத்தை கூட கேரள அரசு மதிக்கவில்லை. இது தொடர்பாக இந்திய கம்யூனிஸ்ட் கட்சியின் தேசிய பொதுச் செயலாளருக்கு கடிதம் எழுதியுள்ளோம்” எனத் தெரிவித்துள்ளார்.
இதனால் தற்போது கேரளாவில் மார்க்சிஸ்ட் கம்யூனிஸ்ட் கட்சியில் விரிசல் ஏற்படும் சூழல் உருவாகியுள்ளது.
Comments are closed.