தூய்மைப் பணிகளை மேற்கொண்ட கோவை மாநகராட்சி ஊழியர்களுக்கு குப்பை வண்டியில் உணவு மற்றும் குடிநீர் பாட்டில்கள் கொண்டு வந்து விநியோகம் செய்தது பொதுமக்கள் மத்தியில் பெரும் அதிர்ச்சியை ஏற்படுத்தியுள்ளது.
கோவை காந்திபுரம் மத்திய சிறைச்சாலை வளாகத்தில் 45 ஏக்கரில் ரூ.214.25 கோடி செலவில் செம்மொழி பூங்கா அமைப்பதற்காக நடைபெற்றுவரும் பணிகளை நகராட்சி நிர்வாகத்துறை அமைச்சர் கே.என்.நேரு நவம்பர் 15ஆம் தேதி நேரில் பார்வையிட்டு ஆய்வு செய்தார்.
அப்போது அங்கு தூய்மைப் பணிகளை மேற்கொண்டு வந்த மாநகராட்சி ஊழியர்களுக்கு உணவுப் பொட்டலம் மற்றும் தண்ணீர் பாட்டில் வழங்கப்பட்டது. ஆனால் உணவுப் பொட்டலங்கள் மற்றும் தண்ணீர் பாட்டில்களை மாநகராட்சி குப்பை அள்ளும் வண்டியில் கொண்டு வந்து விநியோகம் செய்தது பெரும் அதிர்ச்சியை ஏற்படுத்தியுள்ளது.
இது மாநகராட்சி நிர்வாகத்தின் அலட்சியப்போக்கைக் காட்டுவதாகவும், கிருமிகள் மூலம் நோய்த்தொற்று பரவும் அபாயம் ஏற்பட்டுள்ளதாகவும் கூறி மாநகராட்சி ஊழியர்கள் தங்களது மனக்குமுறலை வெளிப்படுத்தி உள்ளனர்.
ஏற்கெனவே மாநகராட்சி ஊழியர்களுக்கு சம்பளப் பிரச்சினை, பணி நேர முரண்பாடு, முறையான பாதுகாப்பு உபகரணங்கள் வழங்காதது என பல்வேறு குற்றச்சாட்டுகளை ஊழியர்கள் கூறிவரும் வேளையில், இதுபோன்று குப்பை வண்டியில் கொண்டுவந்து உணவு வழங்கியது பெரும் அதிர்ச்சியை ஏற்படுத்தியுள்ளது.
Comments are closed.