சென்னையில் இருந்து வழக்கம்போல் விமானங்கள் இயக்கம்!

டிட்வா புயலின் வேகம் குறைந்ததையடுத்து, சென்னை விமான நிலையத்தில் இருந்து இயக்கப்படும் விமானங்கள் இன்று (நவ.30) வழக்கம்போல் இயக்கப்படுகிறது.

புயல் நவ.30 (ஞாயிற்றுக்கிழமை) காலை கரையைக் கடக்கக்கூடும் என இந்திய வானிலை ஆய்வு மையம் தெரிவித்து இருந்தது. அதன் காரணமாக, ஞாயிற்றுக்கிழமையன்று சென்னை விமான நிலையத்தில் 36 உள்நாட்டு விமானங்கள், 11 சர்வதேச விமானங்கள் என மொத்தம் 47 விமானங்கள் ரத்து செய்யப்படும் என முன்னதாக அறிவிக்கப்பட்டிருந்தது.

இந்நிலையில், டிட்வா புயலின் வேகமும், மழையும் குறைந்ததையடுத்து, சென்னை விமான நிலையத்தில் இருந்து தூத்துக்குடி, மதுரை, திருச்சிக்கு இயக்கப்படும் விமானங்கள் இன்று வழக்கம்போல் இயக்கப்படும் எனத் தெரிவிக்கப்பட்டுள்ளது.

மேலும், சென்னை-யாழ்ப்பாணம் இடையே இயக்கப்படும் 2 விமானங்கள் மட்டும் இன்று ரத்து செய்யப்பட்டுள்ளதாகத் தெரிவிக்கப்பட்டுள்ளது.