திமுக அரசை மக்கள் மன்னிக்க மாட்டார்கள்: எடப்பாடி பழனிசாமி!

மக்களுக்கு துரோகம் செய்யும் திமுக ஆட்சியை மக்கள் மன்னிக்க மாட்டார்கள் என அதிமுக பொதுச் செயலாளர் எடப்பாடி பழனிசாமி தெரிவித்துள்ளார்.

திருப்பூர் மாவட்டம் மடத்துக்குளம் தொகுதியில் பிரசாரம் மேற்கொண்டு எடப்பாடி பழனிசாமி பேசியதாவது:
‘இண்டி’ கூட்டணி நாட்டுக்கு நல்லது செய்யும் எனக் கூறும் ஸ்டாலின், கேரளாவிலுள்ள கம்யூனிஸ்ட் அரசுடன் பேச்சுவார்த்தை நடத்தி ஆனைமலையாறு – நல்லாறு அணை கட்ட நடவடிக்கை எடுக்க வேண்டும். இல்லையென்றால், விவசாயிகளுக்கு துரோகம் செய்யும் அரசை மக்கள் மன்னிக்க மாட்டார்கள்.

அதிமுக ஆட்சியில் குடிமராமத்து திட்டம் கொண்டு வந்து, 6,000 பொதுப்பணித்துறை, 26,000 உள்ளாட்சி அமைப்புகளுக்கு சொந்தமான குளம், குட்டைகள் தூர்வாரப்பட்டு மழைநீர் சேமிக்கப்பட்டது.
மறுபுரம் விவசாயிகளுக்கு வண்டல் மண் இலவசமாக வழங்கப்பட்டு, விளை நிலங்களும் வளமாகின. இத் திட்டத்தையும், திமுக அரசு முடக்கியது.

அதிமுக மீண்டும் ஆட்சிக்கு வந்ததும், குளம், குட்டைகள் மற்றும் அமராவதி, திருமூர்த்தி அணைகளில் விவசாயிகள் வண்டல் மண் எடுக்க அனுமதி வழங்கப்படும்.

மூன்றாண்டுகளாக மூடப்பட்டுள்ள அமராவதி சர்க்கரை ஆலையை மீண்டும் திறக்கவும், விவசாயிகளுக்கு 24 மணி நேரமும் மும்முனை மின்சாரம் வழங்கவும் ஏற்பாடு செய்யப்படும் எனத் தெரிவித்தார் எடப்பாடி பழனிசாமி.