வாக்குச் சாவடி அலுவலர்கள் வழங்கிய கணக்கெடுப்பு படிவங்களை, பூர்த்தி செய்து விரைவாக ஒப்படைக்க வேண்டும் என தமிழக தலைமை தேர்தல் அலுவலர் அர்ச்சனா பட்நாயக் கேட்டுக் கொண்டுள்ளார்.
எக் காரணத்தைக் கொண்டும், கணக்கெடுப்பு பணிக்கு கால நீட்டிப்பு வழங்கப்படாது என அவர் தெரிவித்துள்ளார்.
இதுகுறித்து அர்ச்சனா பட்நயாக் கூறியிருப்பதாவது:
இந்திய தேர்தல் ஆணையம் உத்தரவின்படி, எஸ்ஐஆர் எனும் வாக்காளர் பட்டியல் சிறப்பு தீவிர திருத்தப் பணிகள் நடைபெற்று வருகின்றன. தமிழகத்தில் மொத்தம் 6.41 கோடி வாக்காளர்கள் பட்டியலில் உள்ளனர். அதில், 6.16 கோடி வாக்காளர்களுக்கு கணக்கெடுப்பு படிவங்கள் வழங்கப்பட்டுள்ளன.
அடுத்த மாதம் 4ஆம் தேதி வரை இப் பணிகள் நடைபெறும். பூர்த்தி செய்யப்பட்ட படிவங்களை திரும்ப பெற்று இணையத்தில் பதிவேற்றம் செய்யும் பணிகளும் நடைபெற்று வருகின்றன. இப் பணிகள் 50 சதவீதம் முடிவடைந்துள்ளன.
தகுதியான வாக்காளர்கள் நீக்கப்பட்டிருந்தால் அதற்கு வாக்குச்சாவடி வாரியாக விளக்கம் அளிக்கப்படும்.
கணக்கெடுப்பு படிவத்தை பெற்ற வாக்காளர்கள் அதை தங்களது வாக்குச்சாவடி அலுவலரிடம் விரைந்து ஒப்படைக்க வேண்டும். எக் காரணத்தைக் கொண்டும் கணக்கெடுப்பு பணிக்கு கால நீட்டிப்பு வழங்கப்படாது. திட்டமிட்டபடி டிசம்பர் 4ஆம் தேதி பணிகள் நிறைவு பெறும் என அர்ச்சனா பட்நாயக் தெரிவித்துள்ளார்.
Comments are closed.