உயர்நீதிமன்ற மதுரை கிளையில் துப்பாக்கியால் சுட்டு தற்கொலை செய்து கொண்ட காவலர்

உயர் நீதிமன்ற மதுரை கிளையில் பாதுகாப்பு பணியில் இருந்த சிறப்பு காவல்படை காவலர் இன்று அதிகாலை துப்பாக்கியால் சுட்டுத் தற்கொலை செய்து கொண்டார்.

மதுரை மாவட்டம் எழுமலை கோட்டைப்பட்டியைச் சேர்ந்த மகாவலிங்கம் சிறப்பு காவல் படையில் 2003ஆம் ஆண்டு காவலராக சேர்ந்துள்ளார். சென்னை உயர் நீதிமன்ற மதுரை அமர்வு முன்பாக நேற்றிரவு முதல் பாதுகாப்பு பணியில் ஈடுபட்டு வந்தார். இந்நிலையில், இன்று அதிகாலை 3 மணியளவில் பாதுகாப்பிற்காக வைத்திருந்த துப்பாக்கியால் திடீரென தனக்குத் தானே சுட்டுக்கொண்டு தற்கொலை செய்து கொண்டார்.
அப் பகுதியில் பாதுகாப்பு பணியில் இருந்த மற்ற காவலர்கள் மகாலிங்கத்தை ஆம்புலன்ஸ் மூலமாக மருத்துவமனைக்கு அனுப்பி வைத்தனர்.

அவரை பரிசோதித்த மருத்துவர்கள் வரும் வழியிலேயே காவலர் மகாலிங்கம் இறந்துவிட்டதாக தெரிவித்தனர். இதையடுத்து அவரது உடல் உடற்கூராய்வுக்காக மதுரை அரசு ராஜாஜி மருத்துவமனையில் வைக்கப்பட்டுள்ளது.

இச் சம்பவம் குறித்து உயர்நீதிமன்ற மதுரை அமர்வு காவல் நிலைய போலீஸார் வழக்குப்பதிவு செய்து விசாரணை நடத்தி வருகின்றனர்.

தனது தற்கொலைக்கு யாரும் காரணமில்லை என காவலர் மகாலிங்கம் கடிதம் எழுதி வைத்துவிட்டு தற்கொலை செய்து கொண்டதாக முதல் கட்ட விசாரணையில் தெரியவந்துள்ளது.