பெங்களுருவில் ஏடிஎம்-களுக்கு பணம் ஏற்றிச் செல்லும் வாகனத்தை நவம்பர் 19ஆம் தேதி வழிமறித்து துப்பாக்கி முனையில் ரூ.7.11 கோடி கொள்ளையடித்த சம்பவம் தொடர்பாக போலீஸ் கான்ஸ்டபிள் உள்பட 3 பேரை போலீஸார் கைது செய்துள்ளனர்.
கைது செய்யப்பட்டவர்களில் ஒருவரான அன்னப்ப நாயக், பெங்களுரு கிழக்கு கோவிந்தபுரா காவல் நிலையத்தைச் சேர்ந்த போலீஸ் கான்ஸ்டபிள் ஆவார்.
இவர் தான் இக் கொள்ளைச் சம்பவத்தில் மூளையாகச் செயல்பட்டுள்ளார் என்பதும், தான் ஒரு போலீஸ் என்பதால் போலீஸாரிடம் சிக்காமல் கொள்ளையடிப்பதற்கான நுணுக்கங்களை அவரே தனது கூட்டாளிகளுக்கு சொல்லிக் கொடுத்துள்ளார் என்பதும் போலீஸாரின் விசாரணையில் தெரிய வந்துள்ளது.
கொள்ளை நடந்த தினத்தன்று, நகரின் தெற்கு மற்றும் கிழக்கு மண்டலங்களில் போலீஸார் பல சோதனைச் சாவடிகளை அமைத்து வாகனங்களைச் சோதனையிட்டுள்ளனர். அன்னப்ப நாயக் அங்கு பணியில் இல்லாதபோதும், அவர் ஒரு சோதனைச் சாவடிக்கு வந்து, அங்கு பணியில் இருந்த தலைமைக் காவலரை அணுகி, கொள்ளைச் சம்பவம் குறித்து விசாரித்துள்ளார்.
குறிப்பாக, கொள்ளையர்கள் தப்பிச் செல்லப் பயன்படுத்திய வாகனத்தைக் கண்டுபிடித்து விட்டார்களா எனக் கேட்டுள்ளார். மேலும், இணையத்தில் பரவிய ஒரு புகைப்படத்தைக் காட்டி அது உண்மையானதா எனக் கேட்டுள்ளார். அதே இடத்தில் இருந்தபடி, வயர்லெஸ் தகவல் தொடர்புகளையும் அவர் கண்காணித்துள்ளார்.
வேறு ஒரு காவல் நிலையத்தைச் சேர்ந்த கான்ஸ்டபிள் இங்கு வந்து ஏன் இவ்வளவு ஆர்வம் காட்ட வேண்டும் என தலைமைக் காவலருக்கு சந்தேகம் ஏற்பட்டது. எனவே இது குறித்து அவர் தனது மேலதிகாரிகளுக்கு தெரியப்படுத்தினார்.
இதையடுத்து , கான்ஸ்டபிள் அன்னப்பா நாயக்கின் நடவடிக்கைகளை காவல்துறையினர் கண்காணிக்கத் தொடங்கினர். பின்னர், அவரை காவல்துறை அதிகாரிகள் காவலில் எடுத்து விசாரித்தனர்.
அப்போது நடத்தப்பட்ட தீவிர விசாரணையில், இக் கொள்ளையில் தனக்கிருந்த பங்கை கான்ஸ்டபிள் அன்னப்பா நாயக் ஒப்புக் கொண்டார். மேலும், இவ்வழக்கில் கைது செய்யப்பட்டுள்ள மற்றொரு குற்றவாளியான சேவியருடன் அவருக்கு இருந்த தொடர்புகளை அவரது செல்போன் அழைப்புகள் உறுதிபடுத்தின.
தற்போது அன்னப்பா நாயக் உள்ளிட்ட 3 குற்றவாளிகளும் 10 நாள் காவலில் வைக்கப்பட்டுள்ளனர். மேலும், விசாரணை நடைபெற்று வருகிறது.
Comments are closed.