பிகார் துணை முதல்வர் கார் மீது தாக்குதல்!

பிகார் சட்டப்பேரவைத் தேர்தலுக்கான முதல் கட்ட வாக்குப் பதிவு நடைபெற்று வரும நிலையில், துணை முதல்வர் விஜய் குமார் சின்ஹா சென்ற காரை ராஷ்;ட்ரிய ஜனதா தளத்தின் ஆதரவாளர்கள் தடுத்து நிறுத்தி தாக்குதல் நடத்தியுள்ளனர். இதனால் பெரும் பரபரப்பு ஏற்பட்டுள்ளது.

பிகார் சட்டப்பேரவைக்கான தேர்தலில் முதல் கட்டமாக 121 தொகுதிகளில் இன்று காலை 7 மணிக்கு வாக்குப்பதிவு தொடங்கி நடைபெற்று வருகிறது.

இந்நிலையில், லக்கிசராய் தொகுதியில் போட்டியிடும் பிகார் துணை முதல்வரும் பாஜக தலைவருமான விஜய் குமார் சின்ஹா தனது தொகுதிக்குட்பட்ட வாக்குச் சாவடிகளுக்கு காலை முதல் நேரில் சென்று ஆய்வு செய்து வருகிறார்.

அவரது தொகுதிக்குட்பட்ட கோரியாரி கிராமத்துக்கு விஜய் குமார் சின்ஹா சென்றபோது, அவரை ஊருக்குள் நுழைய விடாமல் ராஷ்ட்ரிய ஜனதா தள ஆதரவாளர்கள் தடுத்து நிறுத்தி, மாட்டுச் சாணம், கற்கள், காலணிகளை அவரது காரின் மீது வீசி அவருக்கு எதிராக கோஷங்கள் எழுப்பினர். இதனால் அப்பகுதியில் பரபரப்பு ஏற்பட்டது.

இதையடுத்து அவர் மாவட்ட எஸ்.பி.யை தொடர்பு கொண்டு அதிரடிப்படையினரை அனுப்புமாறும், தான் போராட்டத்தில் ஈடுபடப்போவதாகவும் தெரிவித்தார்.

பின்னர் செய்தியாளர்களுடன் பேசிய விஜய் குமார், “இவர்கள் அனைவரும் ஆர்ஜெடி குண்டர்கள். ஆட்சியில் இல்லாதபோதே இவர்களின் அட்டூழியங்களைப் பாருங்கள். என் வாக்குச்சாவடி முகவரை விரட்டி காலை 6.30 மணிக்கே வெளியே அனுப்பி விட்டனர். வாக்காளர்களை வெளியே வர விடவில்லை” எனக் குற்றஞ்சாட்டினார்.