ஐயப்பனை வைத்து கேரள அரசு பிக்-பாக்கெட்: அண்ணாமலை குற்றச்சாட்டு!

ஐயப்பனை வைத்து கேரள அரசு பிக்-பாக்கெட் செய்வதாக தமிழக பாஜக முன்னாள் தலைவர் அண்ணாமலை விமரிசித்துள்ளார்.

கேரள மாநிலம் சபரிமலையில் உள்ள பம்பா நதிக் கரையில், ஐயப்ப பக்தர்களின் சர்வதேச மாநாட்டை கேரள அரசு கடந்த வாரம் நடத்தியது.

அதைத் தொடர்ந்து, கேரள மாநிலம் பந்தளத்தில் பாஜக சார்பில் சமரக்ஷண சங்கமம் என்ற நிகழ்ச்சி நடத்தப்பட்டது. அதன் தொடக்க விழாவில் பங்கேற்றுப்  பேசிய அண்ணாமலை, சபரிமலையை வைத்து கேரள அரசு பிக்-பாக்கெட் அடிப்பதாக விமரிசித்து இருந்தார். மேலும், கேரளம் மற்றும் தமிழக முதலவர்களை கடுமையாக விமரிசித்து இருந்தார்.

இந்நிலையில், சென்னையில் இன்று செய்தியாளர்களை சந்தித்துப் பேசிய அண்ணாமலை, கேரளத்தில் தொடர்ந்து பாஜக தொண்டர்களை கொடுமைப்படுத்தி வருகின்றனர். மார்க்சிஸ்ட் கம்யூனிஸ்ட் கட்சியினர் பாஜகவினரை தொடர்ந்து படுகொலை செய்து வருகின்றனர் எனக் குற்றஞ்சாட்டினார்.

“சபரிமலை ஐயப்பன் கோவிலுக்கு 2024-25ஆம் ஆண்டில் மட்டும் ரூ.421 கோடி காணிக்கையாக பக்தர்கள் கொடுத்துள்ளனர். இதற்கு முன்னதாக, கடந்த 2 ஆண்டுகளிலும் தலா ரூ.350 கோடிக்கு மேல் காணிக்கை கிடைத்துள்ளது. ஆனால், அடுத்த 50 ஆண்டுகளுக்கு சபரிமலை மேம்பாட்டு பணிகளுக்கு ரூ.1,000 கோடி ஒதுக்குவதாக தெரிவித்துள்ளனர். இதற்கு பெயர் பிக்-பாக்கெட் இல்லாமல் வேறென்ன?” என்றார் அண்ணாமலை.

பினராயி விஜயன் அடிப்படையில் கடவுளை நம்பாதவர். கடவுள் இல்லை என்பவர். அவர் ஏன் ஐயப்பனுக்கு மாநாடு நடத்த வேண்டும்? அரசியல் ஆதாயத்துக்காக இதைச் செய்துள்ளனர் என்றார் அண்ணாமலை.