திருச்சி பீமநகர் பகுதியில் காவலர் குடியிருப்பில் சிறப்பு எஸ்ஐ வீட்டிற்குள் தஞ்சம் புகுந்த இளைஞர் ஆயுதம் தாங்கிய கும்பலால் வெட்டிக் கொலை செய்யப்பட்ட சம்பவத்திற்கு பாஜக முன்னாள் மாநிலத் தலைவர் அண்ணாமலை கடும் கண்டனம் தெரிவித்துள்ளார்.
இதுகுறித்து அவர் வெளியிட்டுள்ள அறிக்கையில் கூறியிருப்பதாவது:
திமுக ஆட்சியில் தமிழகத்தில் படுகொலைகள் நடைபெறாத நாளே இல்லை எனும் அளவுக்கு சட்டம் ஒழுங்கு சீர்குலைந்து இருக்கிறது. இதன் உச்சகட்டமாக, இன்று காலை, திருச்சி பீமநகர் மார்சிங் பேட்டையில் பள்ளிகள் அதிகம் உள்ள பகுதியில், குறிப்பாக காவலர் குடியிருப்பு உள்ளேயே புகுந்து ஒருவரை வெட்டி படுகொலை செய்திருப்பது பொதுமக்கள் பாதுகாப்பை கேள்விக்குறியாக்கி இருக்கிறது.
முதல்வர் ஸ்டாலின் தற்போது திருச்சியில் தான் தங்கியிருக்கிறார். அப்படி இருக்கும்போது இப்படி ஒரு படுகொலை நடப்பது தமிழகத்தில் சட்டம் ஒழுங்கின் அவலநிலையைக் காட்டுகிறது. பெண்கள், முதியவர்கள், குழந்தைகள் என யாருக்குமே பாதுகாப்பில்லாத நிலையில் தமிழகம் தரம் தாழ்ந்திருக்கிறது.
போலீஸ் துறைக்கு பொறுப்பான முதல்வர் ஸ்டாலின், கையாளாகாத நிலையில் போலீஸாரை வைத்திருப்பது, தமிழகத்தின் சாபக்கேடு என அவ்வறிக்கையில் அண்ணாமலை கூறியுள்ளார்.
Comments are closed.