தனது பண்ணை வீட்டில் வேலை செய்த 48 வயது பெண்ணை பாலியல் வன்கொடுமை செய்த வழக்கில் முன்னாள் பிரதமர் தேவகவுடாவின் பேரனும், மதச்சார்பற்ற ஜனதா தள கட்சியின் முன்னாள் எம்.பி.யுமான பிரஜ்வல் ரேவண்ணா குற்றவாளி என சிறப்பு நீதிமன்றம் தீர்ப்பளித்துள்ளது.
பிரஜ்வல் ரேவண்ணாவுக்கு எதிராக மூன்று பாலியல் வன்கொடுமை வழக்குகள், ஒரு பாலியல் துன்புறுத்தல் வழக்கு என மொத்தம் 4 வழக்குகள் உள்ளன. எம்.பி மற்றும் எம்எல்ஏ.க்கள் மீதான குற்ற வழக்குகளுக்கான சிறப்பு அமர்வு நீதிமன்றம் ரேவண்ணாவின் வழக்குகளை விசாரித்து வருகிறது.
இதில், தனது குடும்பத்துக்குச் சொந்தமான பண்ணை வீட்டில் பணிபுரிந்துவந்த 48 வயது பெண்ணை பாலியல் வன்கொடுமை செய்த வழக்கு விசாரணை கடந்த மே 2ஆம் தேதி தொடங்கியது. நீதிபதி சந்தோஷ் கஜனன் பட் இவ்வழக்கை விசாரித்து வந்தார்.
இவ்வழக்கின் விசாரணை தினமும் நடைபெற்றுவந்த நிலையில், இரு தரப்பு வாதங்கள் நிறைவடைந்து, பிரஜ்வல் ரேவண்ணா பாலியல் குற்றவாளி என இன்று தீர்ப்பு அளிக்கப்பட்டது. தண்டனை விவரம் நாளை (ஆக.2) அறிவிக்கப்படும் என எதிர்பார்க்கப்படுகிறது.
Comments are closed.