காய்ச்சல், சளித் தொற்று, கிருமித் தொற்று, ஜீரண மண்டல பாதிப்பு உள்ளிட்ட பாதிப்புகளுக்கு தற்போது பயன்படுத்தப்படும் 94 மருந்துகள் தரமற்றவை என்றும், 3 மருந்துகள் போலியானவை என்றும் கண்டறியப்பட்டுள்ளதாக மத்திய மருந்து தரக் கட்டுப்பாட்டு வாரியம் அறிவித்துள்ளது.
மருந்து உற்பத்தி நிறுவனங்கள் மற்றும் மருந்தகங்களில் மேற்கொள்ளப்பட்ட பரிசோதனை மற்றும் ஆய்வில் இந்த அதிர்ச்சிகரமான உண்மை கண்டறியப்பட்டுள்ளது.
நாட்டில் விற்பனை செய்யப்படும் அனைத்து வகை மருந்து மாத்திரைகளும் மத்திய மற்றும் மாநில மருந்து தரக் கட்டுப்பாட்டு வாரியங்கள் மூலம் ஆய்வு செய்யப்படுகின்றன. அதேபோன்று போலி மருந்துகளும் கண்டறியப்பட்டு அதனடிப்படையில் உரிய நடவடிக்கை எடுக்கப்படுகிறது.
அதன்படி, கடந்த மாதம் ஆயிரத்துக்கும் மேற்பட்ட மருந்து மாதிரிகள் ஆய்வுக்கு உட்படுத்தப்பட்டன. அதில், 94 மருந்துகள் தரமற்றவை என்றும், 3 மருந்துகள் போலியானவை என்றும் கண்டறிப்பட்டன.
இதையடுத்து, அவற்றை உற்பத்தி செய்த நிறுவனங்களிடம் விளக்கம் கேட்கப்பட்டுள்ளதாகவும், அதன்பேரில் அடுத்தகட்ட நடவடிக்கை எடுக்கப்படும் என்றும் தகவல்கள் வெளியாகியுள்ளன.
இம் மருந்துகள் எவை எவை என்பன குறித்த விவரங்களை மத்திய மருந்து தரக் கட்டுப்பாட்டு வாரியத்தின் cdso.gov.in என்ற இணையதளப் பக்கத்தில் வெளியிட்டுள்ளது. எனவே பொதுமக்கள் இவ் விவரங்களை அத் தளத்தில் அறிந்து கொண்டு விழிப்புணர்வுடன் செயல்பட வேண்டும் என மத்திய மருந்து தரக் கட்டுப்பாட்டு வாரியம் கேட்டுக் கொண்டுள்ளது.
Comments are closed.