பெண் குழந்தை கடத்தல்: 5 பேர் கைது

இரண்டு வயது பெண் குழந்தையை கடத்திய 5 பேர் கொண்ட கும்பலை ஒட்டன்சத்திரம் போலீஸார் கைது செய்து, குழந்தையை பத்திரமாக மீட்டனர்.

திண்டுக்கல் மாவட்டம் ஒட்டன்சத்திரம் சம்சுதீன் குடியிருப்பைச் சேர்ந்தவர் மஞ்சுளா. வயது 25. இவர் கணவனைப் பிரிந்து 2 வயது பெண் குழந்தையுடன் வசித்து வருகிறார்.

இந்நிலையில், மஞ்சுளாவின் சித்தப்பா மகன் விக்னேஷ் என்பவருக்கும், ஜோகிப்பட்டியை அடுத்த புல்லாக்கவுண்டனூரைச் சேர்ந்த திவ்யா என்வருக்கும் திருமணம் தாண்டிய உறவு இருந்ததாகக் கூறப்படுகிறது. இவ்விவகாராம் திவ்யாவின் கணவருக்கு தெரிய வந்ததால், அவ்விருவரும் குழந்தையுடன் வீட்டைவிட்டு வெளியேறினர்.

இதுகுறித்து திவ்யாவின் கணவர் கலைச்செல்வன் இடையகோட்டை காவல் நிலையத்தில் அளித்த புகாரின்பேரில், போலீஸார் மதுரையில் தங்கியிருந்த திவ்யா, விக்னேஷ் ஆகிய இருவரையும் பிடித்து காவல் நிலையத்துக்கு அழைத்து வந்தனர்.

அப்போது, திவ்யா தனது கணவருடன் செல்ல மறுத்ததால், மஞ்சுளாவுடன் அனுப்பி வைக்கப்பட்டார். இந்நிலையில், திவ்யா மீண்டும் விக்னேஷ் கூட சென்றுவிட்டார்.

இதனால் ஆத்திரமடைந்த திவ்யாவின் கணவர் கலைச்செல்வன், திவ்யாவின் தந்தை பத்மநாதன் (57), உறவினர்கள் கேசவன்(24), சதாசிவம் (57), கண்ணதாசன் (33), காளிங்கராயன் (58) ஆகியோர் மஞ்சுளாவின் வீட்டுக்குச் சென்று, திவ்யா மற்றும் குழந்தை எங்கே எனக்கேட்டு அவரிடம் தகராறில் ஈடுபட்டுள்ளனர். பின்னர், மஞ்சுளாவை மிரட்டி, அவரது 2 வயது பெண் குழந்தையை அவர்கள் கடத்திச் சென்றுவிட்டனர்.

இதுகுறித்து மஞ்சுளா அளித்த புகாரின்பேரில், ஒட்டன்சத்திரம் காவல் நிலைய போலீஸார் கலைச்செல்வன் உள்ளிட்ட 6 பேர் மீது வழக்குப் பதிவு செய்து அவர்களைத் தேடி வந்தனர்.

இந்நிலையில், தலைமறைவாக இருந்த பத்மநாதன், கேசவன், சதாசிவம், கண்ணதாசன், காளிங்கராயன் ஆகிய 5 பேரை போலீஸார் புதன்கிழமை கைது செய்து, கடத்தப்பட்ட 2 வயது பெண் குழந்தையை மீட்டனர். மேலும், தலைமறைவாக உள்ள கலைச்செல்வனை தேடி வருகின்றனர்.